Jennifer Arends-Reyes (#6 AVP): ta cla pa continua cu su trabou pa Enseñansa y Turismo

Oranjestad: Ta keda Aruba menos cu dos siman pa sali y eherce nan derecho di voto. Un voto cu lo dicidi riba e futuro di pais Aruba pa e proximo 4 añanan nos dilanti. E ta un hecho cu Aruba no por carga mas y kier un cambio, pero e cambio ta den bo propio man!

E candidata Jennifer Arends Reyes a sa di hiba un campaña limpi y husto pero mas ainda un campaña cu a yega serca di e comunidad bishitando asina cas pa cas y combersa cu grandi y chikitonan. Cu dialogo nos por logra hopi y traha riba e cambio tan anhela. Jennifer a sa di scucha e dolor, e preocupacion y e anhelo pa un mihor Aruba. 

Jennifer Arends Reyes ta un persona determina cu firmesa y no tin miedo pa lora manga y traha, y esey ela bin ta hasi semper. Un hoben profesional, bon studia, cu experencia amplio den politica. Un gran curason pa su isla y ta traha pa tanto grandi y chikito! Un persona cu un conocemento amplio riba e tereno di Enseñansa. Como educadora di profesion, Jennifer sa kiko ta locual mester cambia den nos systema di educacion. Un cartera cu no a mira crecemento y tampoco mucho desaroyo na bienestar di nos muchanan y hobennan pero tambe nos maestronan cu ta e weso di lomba di ful nos systema di educacion aki na Aruba. Hopi aña nos maestronan no a mira un crecemento salarial como tambe mehoracion riba nivel di inovacion pa brinda nos muchanan un enseñansa di calidad.

Como miembro di comision di Turismo den Parlamento pa dos temporada, e cartera aki a bin ta haya un lugar serca den Jennifer su curason. Como e unico pilar economico nos mester por brinda nos comunidad e oportunidad pa crece hunto cu turismo, pues si tin un turismo creciente, esaki tambe mester por ta bisto den e ciudadano su cartera como tambe den e poder di compra. Nos tin miles di Rubiano como tambe esnan cu a emigra y hasi Aruba na hogar cu ta trahando den e industria di turismo sin por wak esaki den nan finanzas. Aruba a bin ta mira un crecemento di bishitantenan pero no ta sinti e progreso den pueblo. Mester por mehora e salario pa esnan trahando den e industra aki, mester por crea e turismo di calidad cu poco impacto riba nos miedo ambiente, ta puntonan riba Jennifer su agenda, pero pa logra esaki e mester di bo voto!

Economia ta un cartera cu Jennifer a bin ta studia di serca y profundisa su mes aden pa asina e por dialoga cu esnan concerni pa un mehoracion aki na Aruba. Sinta na mesa cu stakeholdersnan pa mehora e systema financiero ta un punto cu Jennifer tin den mente pa asina cu e haya e oportunidad e por logra esaki. E tabata un momento di habri wowo y mira e realidad aki na Aruba. Canando den varios bario, bo tabata scucha pero principalmente mira e calidad di bida cu tin actualmente na Aruba. Un calidad di bida no apto pa un famia cu yiunan chikito. Muchanan cu den nos bista mester por hiba e pais aki dilanti den un futuro pero sin un systema di economia na su lugar esaki lo bai ta imposibel.

A yega ora pa nos actua. E momento pa mira y realisa cu e situacion na Aruba no por sigui asina ta awor. Nos tin e futuro den nos man. Poco menos cu dos siman, Abo como ciudadano di e pais aki mester por sali di bo cas sin cu mester wordo persigui politicamante. Bo voto mester ta uno sagrado, un sin miedo, un voto di speransa y confiansa. Un voto pa Jennifer Arends Reyes, candidata number 6 riba e lista di AVP ta un voto pa un mihor Aruba!