DMH a certifica un grupo di 12 profesional entusiasma y motiva cu nan rol di Supervisor di Codigo
Departamento di Mucha y Hoben (DMH) a sigui cu otro accion concreto relaciona cu e trabounan riba e area di salvaguardia, educa y informa tocante con pa anda cu Codigo di Proteccion. E training aki tabata consisti di 6 mitar dia na DMH su localidad nobo mes y ta un curso intensivo y dirigi na diferente profesional den 6 sector; social, salubridad, husticia, enseñansa, recreativo y priva. A inicia dia 7 di november y diahuebs 21 di november, e grupo a finalisa nan training, unda a conta cu presencia di Minister di Husticia y Asuntonan Social, sr. Rocco Tjon, pa haci entrega di e certificado. Ta remarcabel cu un biaha mas DMH ta experiencia un grupo di profesional dedica y motiva pa ehecuta nan rol di Supervisor di Codigo y asina traha na bienestar general y proteccion di nos muchanan.
E rol di Supervisor di Codigo ta encera cu e profesionalnan aki den nan organisacion, lo bira e persona asigna pa ta e experto riba e tereno di (sospecho di) abuso di mucha. E coleganan profesional den e organisacion, por acerca den confiansa, pa asina por haya sosten y/of ayudo den forma di conseho y/of guia. Di e forma aki cada profesional por sigui atende cu un caso of situacion di posibel (sospecho di) abuso di mucha.
Ta trata di e profesionalnan: Zoraima Wever – Charlène Marchena- Nisagnerja Mathilda – Seever Krozendijk – Delmary Laclé representando Stichting EPB, sigui pa Mary-Ann Kock di DVG/JGZ, Jerrely Franca di Little Smiles Clinic (sector priva), Audrey Kan di Aruba Clinical Services (sector priva), Rosalina Croes di Bureau Traimerdia, Shennelyn Croes di Fundacion RespetaMi, Desré Mathew di Korps Politie Aruba (KPA) y Christel Choennie di IMSAN.
Un di e metanan di DMH ta pa empodera nos profesionalnan cu conocemento y habilidad concreto y diferente, pa asina por ehecuta e decreto nacional Codigo di Proteccion. Sin laga afor e enfoke principal riba e aspecto preventivo y pa tin mas siguridad y proteccion pa nos mucha- y hobennan na Aruba.
DMH kier gradici tambe tur Trainer Codigo: Jullie-Ann Thode cu a coordina tur e dianan di training, pa asina e coleganan di Trainer Codigo: Jermin Bell, Swinda Dumfries Jeanmiree van der Werf y Jullie-Ann Thode, ehecuta e 6 dianan aki, haciendo esaki cu hopi dedicacion y motivacion. Actualmente Aruba ta conta cu 67 Supervisor di Codigo den e 6 sectornan; husticia, social, enseñansa, social, priva y recreativo cu ta trahando riba e maneho diario di nan rol como Supervisor di Codigo pa ehecuta, monitoria y guia den diferente organisacion, cu traha directo y/of no directo cu mucha y hoben.
