Parlamentario Marco Berlis (MEP) parti 1:
Mike ta papia di pobresa, porfin el a realisa cu ta e mes a causa esaki.

E realidad crudo di nos situacion economico

Aruba probablemente ta pasando den e crisis di mas severo cu el a yega di pasa den su historia como nacion. No tin ningun otro evento cu por ser compara cu locual nos a pasa y ta pasando aden ainda. Y ta mi intencion awe pa por splica pueblo cu exactitude y informacion alcaso, e dinamicanan y impacto di e crisis aki, cu nos lo keda sinti pa basta tempo nos dilanti. Ta bon tambe e ora pa splica punto pa punto con nos a yega aki y cual tabata e condicionnan financiero ora cu Gabinete Wever-Croes a drenta gobierno te den actualidad. Mi lo splica esaki den diferente articulonan cu hechonan proba y alcaso. Ta necesario pa nos papia di e cosnan aki cu un realidad crudo, cu hopi hende den pueblo no kier scucha, pero mester sa si.

Na 2009-2017 e gobierno mas destructivo cu Aruba a yega di conoce a goberna nos dushi pais Aruba. Un gobernacion bao liderasgo di sr. Mike Eman, cu a haya un Aruba resiliente cu un economia sano y fuerte. Nos debe nacional tabata apenas na 48.8% di nos GDP. E Ora ey AVP a drenta gobierno y tur cos a cambia. Mike Eman y AVP a aumenta nos debe nacional te cu casi 80% (Table 1), prestando 2200 miyon cu orguyo pa nos paga. E acto desastroso aki a causa cu Hulanda a interveni, manda Caft pa Aruba y un KB riba cabes di Mike Eman. Te ne dia di awe nos ta sinti e berguensa y impacto cu esaki a causa nos nacion. Lagami splica den detayes pakico!
Si por ehempel pais Aruba su presupesto tabata tin entrada di 5 biyon, cu e debe cu nos tabata tin prome nos por a inverti 3 biyon den nos economia. Ora cu Mike Eman a hipoteca nos pais pa casi 80% di nos GDP, contra tur e normanan di deugdelijk bestuur, awor nos pais solamente lo tabata tin 1 biyon pa inverti. Kiermen, unda por a inverti 3000 miyon den nos pais, awor cu e desastre haci di sr. Mike Eman, solamente por a inverti 1000 miyon so. Y e debe aki tey pa nos yiunan y nietonan pag’e cu orguyo pa hopi aña mas nos dilanti.

Sr. Mike Eman a bin hunga heroe den reunion publico y papia di elimina medida. Pero den su tempo e grandioso cantidad di placa fia aki a bay den nan mesun caretera, den brug y den klinker, pero no den e ser humano! No pa construi scol, no pa renoba scol, no pa renoba centro di barionan, no pa alivia pobresa, ni tampoco pa innova enseñansa! Ademas e placa cu tabata reserva pa un scol di HAVO/VWO na Noord cu ya tabata ful planifica y cu su fondonan disponibel, Mike a tume y hinke den un tram cu ta gasto pa nos pais y ganashi pa su cartera. Despues di tawata tin tur e fondonan aki disponibel pa inverti berdaderamente den nos pais y toch a scoge pa enrikece nan mes, awo nan kier bin pretende y grita cu no ta inverti den enseñansa! Mientras nan no a haci nada pa nos scolnan!

Mike ta papia di pobresa, pero ora el a hipoteca nos pais, el a corta subsidio pa fundacionnan. Asina e Mike a corta ader di fundacionan esencial cu ta brinda ayudo den diferente area na nos pueblo.

Mike ta papia di pobresa, pero e la introduci 30 medida cu a suta nos pais y cu ainda ta resona y afecta nos, entre nan; Aumento di edad pa pensioen cu a bira 65 aña. Aumento di AOV, cu a baha entrada di parehanan cu cientos di florin pa luna, prijs di coriente a subi cu 15%, aumento di vastrecht riba recibo di coriente 25%, introduccion y aumento di BBO cu 2% pa BAZV na 2015 y 2016, aumento di 15% di grondbelasting di e balor di e propiedad y basta otro medida mas.

Mike ta papia di pobresa, pero ora cu Gobierno kier a introduci FASE y Loonsubsidie den tempo di crisis severo nan a vota contra! Lastima cu paso nan si ta biba bon, paso nan si a enrikece nan mes nan no a mira e importancia y urgencia pa pone pan riba mesa di otro. Asina nan ta pone politica anti-Rubiano riba dolor di pueblo y no ta preocupa pa esnan cu a perde trabao, cas, auto, nan negoshi. Tur cos djis pa complace su capricho politico! Gobierno cu kier a yuda pueblo pone pan riba mesa y cubri gastonan basico, mester sa cu sr. Mike Eman a rechasa un ayudo esencial pa nos pueblo!

Mike kier proyecta cu su speechnan un imagen diferente, sinembargo su accionanan ta papia y grita duro pa nan mes! Hopi curashi pa papia bunita, pero nada di curason pa pueblo! Historia y documentonan no ta gaña sr Eman; abo a y ta gaña pueblo pa bo sacia bo hamber pa poder politico. Mike ta papia di pobresa, cu e ta preocupa cu e situacion actual, cu gobierno kier introduci medida so. Mike, Bo historia di disaster ta papia pa su mes. Bo tin cero credibilidad. Bo maneho inacceptabel, desastroso y pa colmo cu signatura di corupcion tur caminda ta un berguensa pa nos pais! Den e siguiente articulo lo mi elabora mas pa pueblo por compronde con nos a yega na e crisis financiero cu nos ta awe.

Table 1
Outstanding debt / GDP (%) Aruba2009 2014 2017

Outstanding debt /GDP (%) 48.8 77.7 75.8
Note. Adapted from Annual Statistical Digest 2020, 2021, p. x-xi. Centrale Bank van Aruba, Aruba.