AVP honra di a forma parti di e foro politico E Voto Moral

Un delegacion di Partido di Pueblo Arubano, AVP a participa den e Foro E Voto Moral organisa pa Iglesianan Cristian Aruba. E encuentro cu a tuma luga diahuebs ultimo na sede di Iglesia Odres Nuevos, a conta cu participacion di solamente algun partido selecta door di e propio miembronan. Naturalmente, AVP como e partido mas grandi na Aruba y di ideologia Cristian Democrata, tabata invita.

E delegacion cu a representa AVP na e foro aki a consisti di Wendrick Cicilia, Clifford Heyliger, Dennerich Kelly, Conny Connor, Diana Bikker y Maria v/d Biezen. AVP ta gradici Pastoor Daal y Iglesianan Cristian Aruba pa e invitacion y oportunidad di por expresa e puntonan di salida di e partido pa loke ta trata moralidad y fe.

Manera, Diana Bikker a splica, AVP ta para pa principio y cu respet mester bin bek den Parlamento. Su entrada den politico, e ta mira como un yamada di Dios pa traha na beneficio di e pais y pa e ciudadano haya confiansa bek den politica y den e ser humano. Den mesun rosea ta bisa cu tur cos ta cuminsa na cas y religion ta mas cu un creencia, pero cu e palabra di Dios ta siña nos moral y principio y no pa implanta nada.

Di su banda, Dennerich Kelly tabata satisfecho di mira cu e temanan di e anochi tabata varia y cu tabatin oportunidad di comparti, no solamente e pensamento di partido, pero tambe personal como cristian. Particularmente a disfruta di e posicion unanime cu e diferente candidatonan no t’ey pa bringa otro, pero pa traha hunto riba loke ta mas esencial. “Kico ta uni nos pa nos traha di un forma eficiente y eficaz na bienestar di nos pais,” Kelly a comenta.