Parlamentario Shailiny Tromp-Lee (MEP) a asisti na apertura di e Exposicion Caribbean Ties cu actualmente ta na Klooster di Imeldahof na Noord

Siman pasa Parlamentario Shailiny Tromp-Lee a asisti na apertura di e Exposicion Caribbean Ties cu actualmente ta na Klooster di Imeldahof na Noord. Despues cu Museo Arqueologico Nacional Aruba (MANA) tabatin e exposicion na nan localidad na Playa y despues na San Nicolas a logra hiba esaki Noord. Asina MANA kier sigui trece e exposicion mas cerca di comunidad di Aruba. Hunto cu Fundacion 1403 y Fundacion Kapel di Bethania, MANA a logra haci esaki posibel.

Caribbean Ties (Lasonan Caribense) ta un exposicion internacional temporario cu ta basa riba resultadonan di e proyecto di investigacion NEXUS 1492. Na 2019 MANA a haya e exposicion Caribbean Ties regala di Universidad di Leiden. E exposicion ta resultado di un proyecto investigativo, lidera pa Universidad di Leiden caminda a traha cu diferente instancia di varios pais den region di Caribe. E exposicion ta trata e colonisacion Spaño den Caribe cu a conduci na transformacionnan drastico di e practicanan cultural indigena. Caribbean Ties ta mustra e papel cu e pueblonan indigena di Caribe a hunga den historia global. E historia di Caribe ta ser presenta for di un perspectiva di su prome habitantenan.

E exposicion a ser presenta na Hulanda, Aruba, Statia y otro islanan di Caribe di mes forma, esta cu varios tema. E temanan ta multiculturalidad, migracion, intercambio economico y social, cambio den comemento y creencia y futuro di pasado. E caracter educativo di Caribbean Ties a ser amplia cu produccion di 4 video cortico cu por keda mira durante e bishita na e exposicion. 

Tromp-Lee ta indica cu e tabata presente na e apertura na Playa y mas cu claro a asisti tambe na e apertura cu a tuma lugar recientemente na Noord. E ta gradici Fundacion Kapel di Bethania, cu actualmente tin un exposicion den Klooster di Imeldahof cu a brinda MANA e oportunidad pa haci esaki.

Fundacion Kapel di Bethania tin un exposicion na e mesun localidad. Un exposicion cu ta conta e historia di e parokia di Noord. Un exposicion cu Tromp-Lee a bishita ya caba 3 biaha y cada biaha ta keda impreciona. E localidad sigur ta uno cu ta trece un paz y trankilidad y e exposicion riba su mes ta tremendo. Bo por disfruta di historia, recuerdo, arte y artefactonan religioso. Potretnan ta presenta storianan di tempo di e soeurnan di e convento di Imeldahof.

Ambos exposicion ta bale la pena bishita. Spera cu e scolnan di Noord y otro organisacionnan por haci bon uzo di e oportunidad mirando cu e exposionnan ta mas cerca di cas. E 2 exposicionnan ta habri riba dialuna, diaranson y diahuebs for di 8.30 a.m te cu 3.30 p.m y ta situa na e Klooster di Imeldahof na Noord. Tambe por yama pa organisa un bishita na tel 5828979.

Dia di Himno y Bandera e ambiente na e Klooster tabata tremendo caminda famianan a siña hopi y por a sinta dushi den e hardin di e klooster. Un pabien na ambos organisacion pa tur esfuerso y trabounan realisa pa haci e exposicionnan aki posibel y accesibel pa pueblo.