Wendrick Cicilia: AVP tin un solidaridad intergeneracional cu empatia y boluntad pa nos grandinan

E lider di lista di Partido di Pueblo Arubano AVP a uni na Lider di Partido Mike Eman den comparti cu prensa local e resultado di e estudio cu academiconan di Universidad di Aruba y University of South Carolina a realisa.

E ta ilustra claramente e sentimento di necesidad y urgencia entre adultonan mayor pa un miho entrada cu por cubri na nan necesidadnan basico; un di e puntonan primordial di e campaña electoral di e partido berde.

“Aruba merece miho awo y nos grandinan merece miho awo,” ta algun di e manera con e hoben politico a trece su punto dilanti. Cicilia ta spera cu e estudio aki no keda ignora, mescos cu gobierno a haci cu e rapport anual 2023 di Raad van Advies; unda cu a describi un situacion ‘sin perspectiva’ pa mas cu 50% di nos comunidad.

E lider di e lista berde ta kere cu, como politico, ta su tarea pa ofrece perspectiva na esun cu no tin e. E ta kere cu e combinacion di entrada abou y aumento di costo di bida ta crea panico financiero cerca esunnan cu a construi nos pais.

“Con nos kier trata esunnan cu a carga e pais aki y ta e pilar di nos desaroyo? Ta riba e schouder di pensionado y adulto mayor no ta para awendia,” asina Cicilia a expresa. “AVP ta kere cu nan merece un trato cu respet y dignidad. P’esey ta un falta di respet y insulto ora politico ta nenga di duna nan un perspectiva di bida.”

Por a scucha recientemente con oponente politico, veterano y tambe cu ta pretende di ta nobo, ta bin dilanti y bisa cu e proposicion di AVP pa aumenta pension no ta realisabel. Sinembargo, pa Cicilia, eski no ta un promesa; e ta un necesidad grandi.

Cicilia: “AVP si a duna oido di berdad na e pueblo ora e grandi ta conta cu e pensioen ta caba den e prome 10 dia y despues e tin cu sobrevivi y scoge entre paga pa remedi, recibo di utilidad of pone cuminda riba mesa. Esaki no ta loke nos ta aspira pa nos hendenan.”

AVP ta e unico partido cu a bin cu un proposicion real, haciendo su mesun studio y mas importante, drentando cas y scuchando e hende. Unda tin dolor, politica mester reacciona y soluciona e dolor, segun Cicilia. Esey ta e desconfiansa cu tin pa e gobierno di e ultimo shete aña cu no tabatin capacidad di soluciona dolor di nos hendenan.

E politico hoben ta kere cu bo no por tin e grandinan na pecho y bo ta duna aumento di apenas 30 florin. Cu esey ta un insulto pa nan. E, hunto cu e ekipo di AVP, ta aspira di biba den un pais unda cu ta duna hende balor, y mas esunnan cu a cana e caminda y genera desaroyo prome cu nos.

El a indica cu e resultado di e rapport di universidad ta haci e compromiso di AVP ainda mas fuerte. Ta sigura cu e partido tin un solidaridad intergeneracional cu empatia pa nos grandinan y boluntad pa bira nan defensor. Pasobra ora ta papia di inclusividad, mester inclui e grandinan den e desaroyo di e pais y un sociedad cu no ta balora su grandinan ta nenga su raiz y ta pone su futuro na peliger.