Candidato di AVP #7, Clifford Heyliger:Aruba tin chens di saca e mandatarionan sin gevoel for di Bestuurskantoor

Ta un secreto publico cu hopi na Aruba ta pasando door di tempo sumamente dificil. Como politico y ex sindicalista, constantemente hende ta acerca mi pa papia di nan situacion. Unda cu mi bay, e mesun temanan ta bin dilanti: e costo di bida haltisimo, placa di pensioen cu no ta yega pa biba dignamente, hopi trahado tin salario abou y mester traha dos trabou of haci algo na banda pa por sobrevivi. Banda di esey huur di apartamento of cas ta carisimo.
E realidad ey no ta desconoci pasobra e ta wordo papia y discuti constantemente den tur media. Loke ta resalta ta e apatia di parti di tur partido politico cu excepcion di Partido di Pueblo Arubano AVP pasobra e 10 punto di gobernacion tabata cla caba, prome cu gobierno a cay. AVP a bishita cas y scucha e pueblo prome cu a yama eleccion mes.
Otro partidonan a core traha nan programa cu glitter pensando cu esey lo hipnotisa e pueblo pa haya nan voto. Pero kico a pasa? Ora e otro politiconan a bay bishita cas, nan a haya un ‘reality check’. Pueblo a laga sa cla y raspa cu nan no por biba cu e nivel di pension aki y cu salarionan ta hopi abou y no ta yega.
Un politico ta wordo eligi pa sirbi e pueblo. Bo lo kere cu e responsabilidad aki lo pone e politico refleha y adapta su plan basa riba e necesidad di pueblo, pero no. Tur loke bo ta tende ta dicon no por a yuda pensionado cu tin cu biba cu 400, 800 of 1,200 florin pa luna, mientras cu e bestaansminimum ta casi 2,700 florin/luna. Cada luna un pensionado ta cay atras cu 1,500 pa 2,000 florin. E reaccion di partido MEP, Raiz y tur otro ta pa uza palabra grandi pa hustifica dicon nan no por/kier yuda pueblo cu nan a huramenta pa sirbi.
Señora Martha
Miss Martha ta un señora cu a pidi pa papia cu Heyliger. Miss Martha a comparti cu ne con dificil e ta pasando pasobra costo di bida ta asina halto cu e no por sobrevivi cu 800 florin pa luna. Miss Martha a comparti cu antes e por a lora cu e 800 florin, pero ya no mas. Cu su gemoed yen Miss Martha a bisa: “Clifford, mi a bay di ta un profesional pa ta un mendigo. Si un persona puntra mi kico nan por yuda mi cu ne, mi ta bisa nan si nan por cumpra fruta pa mi pasobra placa no ta yega pa fruta.”
Esaki ta algo cu Heyliger no por caba di compronde; cu Miss Martha y otro pensionado ta sufriendo pa motibo di costo di bida haltisimo. E pensionado su placa no ta yega y ta sclamando pa ayudo. E unico cos cu partido MEP, Raiz y tur e otro partidonan chikito ta para duro riba dje, ta cu no por. “Nan no por yuda nos pensionado, nan no por yuda esunnan di menos recurso, nan no por duna remedi bek na nos grandinan; un reparticion husto tampoco no por,” e candidato a expresa.
Partido AVP ta para cu nos grandinan pa un reparticion husto di beneficio di e crecemento economico. Clifford Heyliger ta kere cu pueblo no vota pa hende cu ta wak data y cifra so pa bisa bo cu no por, sin tene na cuenta e sentimento y situacion di e ser humano. P’esey mes, otro siman diabierna, Aruba tin e opcion di bolter cos y saca e partidonan sin gevoel di mando.