Francis Malca (LPR): Mester yuda e local cumpli su soño di obtene su prome cas.

Dia pa dia ta bira mas caro pa e ciudadano comun por yega na su prome cas. Esaki tin di haber entre otro cu e scarcedad di terenonan (oferta limita) y e poder di compra di residentenan di afo cu por paga prijsnan halto cu moneda mas fuerte cu e florin di e local (demanda grandi). Pesei bahando costo di construccion lo no resolve e problema principal.

Locual cu mester wordo haci ta aumenta e cantidad di terenonan disponibel (maximalisa oferta), promove traspaso na esnan cu nunca tabata doño di un cas y desmotiva parcialmente traspaso na residentenan di afo (baha e demanda). Den esaki un lista di esnan cu kier ta doño di nan prome cas mester hunga un rol central.

Pa maximalisa e oferta, gobierno mester pa prome tuma bek tur parcela erfpacht cu ta bashi y tur huurgrond cu no ta wordo usa pa su proposito. Y tambe tuma bek tur erfpacht of huurgrond cu tin vivienda inhabita door di problemanan entre herederonan. Gastonan eventual pa logra esaki, cual lo ta minimo en comparacion cu e balor di e tereno obteni, lo por wordo cubri door di esun cu lo adkiri e tereno.

Banda di esei lo por introduci un belasting peculiar na banda di e bendedo ora cu e ta traspasa na un hende cu no ta den e lista di espera. Esaki lo pone e bendedo pensa 2 biaha prome e bende na un persona cu ya tabata doño di un cas of na un residente di afo. Y si dicidi di bende na nan toch, e belasting aki lo por wordo usa como un fondo pa subsidia esnan riba e lista pa por yega na nan prome cas. Tambe lo por asta considera pa prohibi parcelanan specifico of asta sierto (parti di) becindarionan wordo bendi na residentenan di afo.

Por ultimo, e lista di espera no solamente mester contene personanan cu nunca tabata tin un tereno (huurgrond pa cu vivienda, erfpacht of eigendom), pero tambe personanan cu no ta doño economico (‘economische eigenaar’) di un parcela, cu no tin un huurkoop andando y cu no ta bezig na notaris cu un compra. Preveniendo asina cu e ciudadano ta hasi negoshi cu erfpacht a costo di esnan riba e lista di espera.

Esaki ta djis algun di e puntonan, en corto, cu partido LPR (Lucha Pa Reforma) ta propone pa yuda haci e soño di nos local pa yega na nan prome cas, bira realidad. Esaki ta rekeri conocemento aplio y relevante den e materia, cual LPR ta conta cune pa medio di – candidato #4 – Francis Malca  cu ta funcionando como hurista notarial pa mas cu 6 aña. Un voto p’e, ta un vota pa e causa aki.