Parlamentario Alvin Molina (MEP): Agricultura, un pilar economico nobo.

E oportunidad pa garantisa cuminda di calidad pa un bon prijs.

Butucu situa na San Nicolas ta un tremendo luga pa desaroya nos siguiente pilar economico, un industria nobo cu den mi opinion por ta sector primario, specialmente agricultura. E tereno na Butucu ta mes grandi cu Savaneta y Pos Chiquito hunto. E pandemia a siña nos cu ta importante pa diversifica nos economia. Un total di 99% di nos cuminda ta importa cu ta un motibo cu e prijs di cuminda ta halto.

Durante ultimo 3 añanan, den parlamento mi a entrega varios mocion/peticion na gobierno. Tambe, mi a tuma varios iniciativa y a busca informacion riba e topico aki. Mi a consulta cu diferente experto local, den region y na Hulanda. Mi a bishita “farm” na Aruba pa haya sa kico nan falta pa por existi y pa sigui crece. Na Hulanda mi a bishita varios “farm”, Universiteit van Wageningen y a reuni cu politico studia riba e tema. Mi conclusion ta cu agricultura na Aruba ta un posibilidad real cu ayudo di tecnologia moderno. Dimes un industria ta wordo carga door di comerciante, pero gobierno tin un tarea importante pa crea circunstancia faborabel pa haci e comercio posibel, entre otro ekipa Santa Rosa cu e capacidad, experticio y autoridad pa yuda carga e industria, baha tarifa di awa of crea un “source” di awa door di filtra awa di RWZI, baha tarifa di coriente y adapta cierto leynan. Tambe, mester adapta e proceso di Douane pa haci importacion di material pa agricultura mas faborabel, mehora e proceso di “uitgifte huurgrond” di DIP y incorpora ‘sector primario’ den nos sistema di enseñansa. Tin hopi cos practico cu mester y por wordo haci di parti di gobierno.

Como un isla chikito semper nos lo mester importa cuminda, pero si nos inverti den nos sector primario como un industria nobo, nos por mantene miyones di florin riba nos isla mes. Fuera di esaki, zorg cu nos tin producto organico di e miho calidad y na e miho prijs. Ademas, mirando e localidad aki, e industria lo yuda pa trece mas movecion di hende pariba di brug y “boost” e economia na San Nicolas.

Un industria nobo ta rekeri dedicacion y colaboracion estrecho di tur minister envolvi, comparabel cu e industria di turismo. Ta tarea di e minister encarga cu sector primario pa trece su coleganan hunto. Si ami haya e oportunidad pa keda den parlamento, sigur mi lo sigui sostene, motiva,  encurasha y ferfela e minister concerni pa di berdad desaroya e pilar economico nobo aki.