Prome Minister Evelyn Wever-Croes: E circulo vicioso di e gobierno anterior di keda fia y gasta placa A CONDUCI CU ARUBA A HAYA UN KB PA E MAL MANEHO FINANCIERO DI AVP

“Awo ta momento pa sigui cu e strategia y structura di nos maneho financiero cu ya ta cosechando su prome frutanan”

ORANJESTAD — Den e ultimo temporada aki, hopi promesa ta wordo haci pa politiconan especialmente riba e tema di paga debe y fia placa. Esaki ta un efecto di politoconan cu kier ‘bula cu hala di manteca’ sin pensa con esaki lo afecta Aruba y sin tene cuenta cu kico tur Gabinete a logra den un temporada hopi difícil pa nos tur.

E gobernacion prome cu nos di añanan 2009-2017 a hiba un mal maneho financiero, corupcion na gran escala cu tereno y permisonan, pa personanan cu a financia nan campaña. Nan no tabata presta atencion con nan ta manehando Aruba. Y tur esaki a conduci na e Koninklijk Besluit, e decreto real cu Rey Willem Alexander a pone riba Aruba na aña 2014. Den e KB aki ta menciona cu e maneho financiero di e tempo ey tabata malo, cu Aruba tabata gasta mucho mas placa di loke e tabata tin, y cu esey ta trece consecuencianan hopi negativo pa Aruba. Y nos a sinti e consecuencianan ey.

Prome Minister Evelyn Wever-Croes a enfatisa cu Aruba no por bay bek pa e pasado ey. Pasobra Aruba a pasa aden caba y cu e maneho di Gabinete Wever-Croes, e miho dianan di Aruba ta nos dilanti.

Awe Aruba ta wordo reconoci como un ehempel di recuperacion, cu un turismo solido, criminalidad bao di control, inversion substancial den nos sectornan social pa mehora calidad di bida di esnan den mas necesidad. Stadionnan y otro centronan di deporte renoba, inversion den educacion y awor mas y mas tambe den infrastructura. 

“Awor pues ta momento pa sigui cu e strategia y structura di nos maneho financiero cu ya ta cosechando su prome frutanan. Continuando cu e maneho aki nos lo tin mas cosecha cu mas fruta den futuro”, Prome Minister a expresa.

Segun IMF si Aruba sigui cu e maneho actual, otro aña inflacion lo baha di actual average 2.3 % pa 1.8% pa 2025, cual ta miho ainda. Y si nos keda cla cu Aruba su propio linea di barco di carga, e lo por baha mas ainda. Pero si nos cay den e wega di promesanan irealistico di e otronan, inflacion lo tin cu subi, costo di bida lo tin cu subi, pasobra debe di Aruba lo bolbe subi. Esaki sigur Aruba no por permiti.

Prome Minister: “Con-ciudadanonan, dia 6 di December boso cada un tin e oportunidad pa vota pa e partido cu segun bo opion y pensamento liber, por traha pa Aruba por sigui progresa na caminda di prosperidad y felicidad. Pa nos tin un pais caminda bo por bay drumi trankil y lanta mainta sabiendo cu e finansas di bo pais, bo entrada y bo pensioen ta den bon man, debidamente protehi y cu nos hobennan  por conta cu e miho educacion y mas oportunidad pa realisa nan soñonan”.