Procedura y Reglanan di Eleccion

Oranjestad, 4 di December, 2024 – Conseho Electoral Aruba ta informa tur votadonan pa sigui e
siguiente procedura y reglanan pa garantisa un proceso democratico pa Eleccion dia 6 di
December 2024.
Proceduranan

1. Entrega bo documentonan
   ○ Entrega na e Presidente di e urna bo carchi di voto y identificacion valido
2. Registro di bo voto
   ○ Presidente y e di dos miembro di e urna electoral lo controla y confirma e
   number riba e carchi di voto y bo fam den e registro di votadonan
3. Ricibi bo papel di voto (stembiljet)
   ○ Mester drenta un hoki liber momento cu ricibi bo papel di voto (stembiljet) dobla
   di tal manera cu e firma di e Presidente di Conseho Electoral ta visible.
4. Scoge y Vota
   ○ Habri e stembiljet den e hoki y Marca e ronchi na banda robes di e nomber di e
   candidato di bo escogencia cu e potlood cora cu tin den e hoki.
5. Fout mientras votando?
   ○ Si bo a haci un fout mientras votando, avisa e Presidente di e urna di pa ricibi e
   oportunidad pa vota di nobo. Esaki ta permiti 1 biaha solamente pa cada votado.
6. Deposita bo voto
   ○ Prome cu sali di e hoki mester dobla e stembiljet bek den forma cu e firma di e
   Presidente di Conseho Electoral ta mustra y deposit’e di biaha den e buzon
   electoral (stembus). Si NO cumpli cu e esaki e papel di voto NO lo wordo usa y
   e voto ta bai perdi (onbruikbaar gemaakt).
7. Mester di asistencia?
   ○ Si pa motibo di incapacidad fisico (p.e. limitacion di bista o invalidez etc.) tin
   mester di yudansa ora di vota,bo persona mes tin cu indica esaki na e
   Presidente di e urna pa por haya asistencia di un persona di bo confianza.
   Reglanan
   E Presidente di cada urna ta encarga cu mantencion di ordo den e urna. Sigui su instruccionnan
   y e siguiente reglanan pa garantisa un proceso di votacion trankilo, liber y secreto.
   NO ta permiti pa;
   ● Uza celular y/of saca potret den urna.
   ● Haci grabacion den urna.
   ● Come y/of bebe den urna.
   ● Huma den urna.
   

Pa mas informacion, bishita e website oficial di Conseho Electoral Aruba na er.aw y sigui nan
na Facebook y Instagram @consehoelectoralaruba. E plataforma nan lo sirbi como un recurso
importante pa votadonan, candidatonan, partidonan politico y publico general, pa keda al dia cu
anuncionan, fecha nan y guia relevante pa e eleccion di Aruba.