Te cu 31 di december por registra cambio di negoshi pa 2024: KVK LO TA CERA DI 24 DI DECEMBER 2024 TE CU 2 DI JANUARI 2025

Oranjestad –Camara di Comercio y Industria Aruba (KvK) kier a recorda tur empresario pa tene cuenta cu cumplimento cu e rekisitonan necesario pa por cera e aña 2024 cu tur informacion actualisa y alabes anuncia cu nos lo cera pa algun dia durante fin di aña.

KvK lo ta cera pa dianan di fiesta
KvK ta informa tur su clientenan cu su oficina lo ta cera for di diamars, 24 di december 2024, te cu diahuebs, 2 di januari 2025. KvK lo habri bek riba diabierna, 3 di januari 2025.

Compania cu no ta activo mas
Si tin un compania cu ta registra na KvK pero cu esaki no ta activo mas, ta importante pa pone esaki como inactivo of cancela e negoshi den e Registro comercial mas pronto cu ta posibel. Ley ta stipula cu e persona di e negoshi cu ta autorisa (p.e. doño di e negoshi y/o director) tin e deber di cancela e negoshi na KvK. A base di e informacion declara door di e persona autorisa, e status di e compania ta wordo cambia den e sistema di KvK. Esaki ta importante ora di haci declaracion di resultadonan di negoshi (cu no ta activo) na Departamento di Impuesto.

Ultimo dia cu por pasa personalmente na KvK pa cancela un negoshi (“opheffing”) den 2024 ta dia 23 di december 2024. Sinembargo, MyChamber lo keda accesibel y por haci e cambionan online, incluyendo cancela un negoshi, te cu 31 di december 2024. Si bo mester di assistencia pa cancela un negoshi, por pasa libremente tur dia entre 8AM y 12PM of entre 1PM y 4PM te cu 23 di december 2024. Esaki ta conta solamente pa cancela un negoshi. Tur cambio y/of cancelacion di negoshi cu wordo ricibi online via MyChamber, no mas tarda cu 31 di december, lo conta pa 2024.

Doño di negoshi, directornan y otro miembronan di directiva cu no tin nan informacion of contribucionnan anual na ordo por wordo poni responsabel pa negoshi cu no ta cumpliendo cu ley. Pa por sa mas encuanto datonan den registro y cuentanan habri, por tuma contacto cu KvK na 582-1566 of manda un e-mail respectivamente na registers@arubachamber.com of financial@arubachamber.com.

Actualisacion di datos
Segun stipulacion den ley, tur empresario tin e obligacion pa mantene e datos encuanto e adres, structura y maneho di su negoshi actualisa den e registro di KvK. Por verifica si e datos ta corecto door di consulta e Registro online via e website di KvK (www.arubachamber.com) y si ta necesario por bay den e cuenta (account) di e negoshi via MyChamber y haci e cambio(nan) rekeri pa tin e informacion actual. Por medio di e informacion di contacto (e-mail adres), KvK ta manda informa e comerciante encuanto eventonan y actividadnan pa negoshinan, e.o. workshops, presentacionnan, misionnan comercial y diferente desaroyonan relevante pa e empresario. Ademas e ta importante pa inversionistanan y/o posibel partner comercial por bin den contacto cu e empresa. Cu actualisacion di e datos bo ta contribui tambe na un Registro di negoshi cu informacion corecto y asina por haci un miho analisis di e.o. e tendencianan y diversidad economico.

Pago no mas laat cu 23 di december 2024
KvK kier recorda tur compania riba e obligacion pa tin e pagonan di e contribucion anual al dia. Tur pago cu wordo ricibi te cu dia 23 di december 2024 lo wordo procesa ainda den 2024. Tur pago cu drenta despues di e fecha di 23 di december 2024, lo wordo procesa na januari 2025.
Ta urgi tur comerciante pa percura pa e contribucion anual te cu 2024 wordo paga y asina evita gastonan innecesario y/o cu e servicionan di KvK no por wordo brinda. KvK lo manda recordatorio y eventualmente lo por sigui caminda legal pa cu falta di cumplimento di e negoshi.

MyChamber
Ta sumamente importante pa tur negoshi tin un account digital via MyChamber pa nan mes por controla e datos di e compania y alabes haci e cambionan necesario online. Tambe por haci pago via e account, por ehempel pa compra di extracto y otro documentonan y pago di e contribucion anual, sin mester di acudi fisicamente na e oficina di KvK. Esaki ta conta tambe pa pagonan via transferencia di banco. Despues cu e compra y/o pago wordo procesa, e documento y recibo di pago lo ta disponibel digitalmente den e inbox di e account. Desde 2020 KvK a cuminsa manda e cobransa pa e contribucion anual digitalmente via e online account di e companianan, pesey ta haci un apelacion urgente na tur negoshi cu ainda no tin un online account pa percura pa regla esaki mas pronto posibel via MyChamber. E instruccionnan pa crea un account ta poni riba e website di KvK (bao FAQ’s), pero den caso cu no logra por tuma contacto libremente cu KvK via e chattool riba e website di KvK, na tel. 582-1566, ext. 342/335/330 of via e-mail businessinfo@arubachamber.com.