A.T.A.: Aruba Ta Participa den Florida-Caribbean Cruise Association (FCCA) Holiday Gift ProjectUn tradicion Memorabel na Kindertehuis Imeldahof
Aruba Tourism Authority (A.T.A.) orguyosamente ta anuncia su participacion den e proyecto anual FCCA Holiday Gift Project, un iniciativa conmovedor durante dianan di fiesta organisa pa Florida-Caribbean Cruise Association (FCCA), cu ta dirigi na muchanan y hobenan den Caribe y Latino America. E aña aki, e incitiava a eligi muchanan y hobenan di Kindertehuis Imeldahof como e beneficiario di e iniciativa.
Holiday Gift Project ta un iniciativa cu a wordo crea pa trece alegria di fin di aña pa medio di entrega di regalo, y crea un experiencia inolvidabel pa esnan envolvi. E aña aki, muchanan y hobenan di Kindertehuis Imeldahof a disfruta di un dia yena cu sorpresa y actividadnan di fin di aña, creando recuerdonan special pa un y tur.
E evento aki ta demostra un laso y forsa positivo di colaboracion entre FCCA y Aruba, caminda cu varios organisacion ta uni man pa crea un dia magico pa e muchanan y hobenan di Kindertehuis Imeldahof. Por a conta cu momentonan di alegria y yena di ambiente bou di e muchanan y hobenan. Santa Claus a agrega un toke unico na e evento, caminda cu a pasa tempo di calidad hungando futbol, bailando, y hasta zoyando na e speelplaats. E alegria genuino di e conexion aki a crea momentonan cu ta refleha e mision esencial di FCCA Holiday Gift Project: “Pa trece felicidad y crea recuerdonan inolvidabel.” Esaki por a ser ilustra mientras cu e muchanan y hobenan tabata habri nan regalonan den compania y goso di nan bishitantenan special.
Cu mira pa fututo, A.T.A. ta continua cu e dedicacion pa participa den proyectonan cu ta fortalece e comunidad, y e laso entre Aruba y socionan internacional atraves di colaboraion den iniciativa manera FCCA Holiday Gift Project. Aruba ta continua na demostra su compromiso di Corporate Social Responsibility, esta responsabilidad social y bienestar di e comunidad.
Un gratitud sincero ta bai na e ekipo di departamento di Cruise di A.T.A., na Florida-Caribbean Cruise Association (FCCA), e team di Kindertehuis Imeldahof, capitan y tripulacion di Celebrity Eclipse, Diamonds International, y Fofoti Tours and Transfers pa nan contribucion valioso.
