Aruba ta yama bonbini na un aerolinea nobo: Servicio directo di Gol Airlines entre São Paulo, Brasil y Aruba

Oranjestad, Aruba- 19 di december 2024: Aruba Airport Authority N.V. (AAA) ta masha orguyoso pa celebra e vuelo inaugural di GOL Airlines entre São Paulo, Brasil (GRU) y Aruba, enrikeciendo ainda mas e conexion entre e dos regionnan.

E desaroyo aki ta pone enfasis riba un logro importante pa Aruba, mirando cu ta introduci un destinacion nobo cu no tin actualmente y estableciendo São Paulo como e di cuater hub regional Latino Americano y e di 32 destinacion cu un conexion directo. GOL Airlines ta uni como e di 28 aerolinea cu ta brinda servicio na Aeropuerto di Aruba, facilitando e conexionnan no solamente pa São Paulo, Brasil, pero tambe pa e mercadonan clave di Brasil manera Rio de Janeiro (GIG), Belo Horizonte (CNF), Brasília (BSB), Porto Alegre -Salgado Filho (POA), y Manaus (MAO) y tambe pa Chile, Uruguay, Paraguay y Argentina. Mas cu claro ta cu e servicio di GOL ta conecta un tercera parti di e trafico di vuelo pa Aeropuerto Aeroparque na Buenos Aires (AEP), Argentina, engrandeciendo mas ainda e conexion di Aruba dentro di e region Latino Americano.

Cu e expansion aki, Aeropuerto di Aruba ta sigui fortalece su presencia den e mercado Latino Americano, ofreciendo awo 32 vuelo semanal for di nos isla pa e principal centronan di operacion, incluyendo Bogota, Panama City, Lima y awo desde un di e mercadonan di mas grandi di Aruba y e aeropuerto di mas grandi di e region.

E vuelo inaugural, cu a aterisa riba dia 18 di december 2024, a ricibi un caluroso bonbini cu un gran celebracion den sala di yegada di Aeropuerto di Aruba. E evento a conta cu e bonbini for di e representantenan di Gobierno di Aruba, GOL Airlines, Aruba Tourism Authority (A.T.A.), y stakeholdernan clave di e sector di aviacion y turismo. Entre esnan presente tabata t’ey Minister-President Evelyn Wever-Croes, Minister di Turismo y Salud Publico Dangui Oduber, funcionarionan di GOL Airlines, CEO di ATA Ronella Croes y Interim Management Team (IMT) di AAA. E evento a conclui cu e tan tradicional ceremonia di corta cinta y bolo, como simbolo di e inicio oficial di e operacionnan di e ruta nobo.

Fortaleciendo e conexionnan y impulsando turismo                                                       E lansamento di e ruta nobo ta un testimonio di e colaboracion exitoso entre Aeropuerto di Aruba y GOL Airlines. E asociacion strategico aki tin como meta pa impulsa turismo y brinda mas opcion di biahe pa e pasaheronan. Cu tres vuelo semanal cu lo opera riba dialuna, diaranson y diasabra, e ruta nobo lo agrega aproximadamente 528 asiento semanal desde Brasil, locual lo aumenta di un manera significativo e capacidad di asiento desde Latino America. Aeropuerto di Aruba ta mantene su compromiso di brinda un servicio nonstop na e mercadonan clave, mehora conexion pa e biaheronan y sostene crecemento economico di e isla. E lansamento di e ruta directo di Gol Airlines for di São Paulo, Brasil pa Aruba ta un logro significativo cu ta subraya e compromiso aki. Como meta principal di Aeropuerto di Aruba, nos ta dedica pa mantene conexionnan strategico y garantisa e sostenibilidad a largo plaso di nos rutanan. Esaki ta subraya e compromiso di AUA pa fortifica nos posicion como un di e islanan den Caribe cu miho conexion.

Celebrando e crecemento y futuro perspectiva                                                        Region di Latino America a demostra un crecemento remarcabel, cu mas di 309.500 asiento premira pa fin di aña 2024, locual ta refleha un crecemento solido aña tra’i aña di 43%. Mirando nos dilanti, e region ta pronostica pa alcansa 317.051 asiento pa aña 2025, indicando un crecemento di impresionante, cerando aña 2023 cu un aumento di 24% compara cu aña 2019 y un crecemento di 33% den e prome mita aña 2024 compara cu e mesun periodo na aña 2023. E ruta nobo aki ta alinia cu nos meta pa logra un crecemento di 40% den e mercado Brasilero pa aña 2025, cu e meta pa 25.900 bishitante Brasilero.

Minister di Turismo y Salud Publico Dangui Oduber a indica: “Den nomber di Gobierno di Aruba, mi tin e placer pa yama GOL Airlines bonbini na nos isla, fortaleciendo nos conexion aereo cu Sur America ainda mas. E asociacion aki ta crea oportunidad pa profundisa e lasonan cultural, economico y turistico entre Aruba y Brasil, fomentando crececemento y colaboracion mutuo. Cu red extenso di GOL, nos ta spera di yama bonbini na mas biahero di Sur America pa experencia e beyesa unico di Aruba, como tambe e cultura vibrante y hospitalidad caluroso. E adicion strategico aki ta alinia cu nos vision di turismo sostenibel door di mehora accesibilidad mientras ta conserva nos herencia cultural. Nos tin confiansa cu e colaboracion aki lo engrandece mas ainda e posicion di Aruba como un destinacion premier den Caribe”.

Rafael Araújo, Director of Air Network Planning di GOL, a enfatisa: “Cu Aruba, awo GOL ta sirbi 15 destinacion y 16 aeropuerto internacional den henter America y lo sigui fortifica su presencia den exterior. Como un aerolinea nacional cu ta carga un reconocimiento fuerte bou di e Brasileronan, nos enfoke ta keda riba expansion internacional continuo. Nos ta e unico compania cu ta ofrece vuelonan directo pa Aruba for di Brasil. Esaki ta duna nos e siguridad cu nos ta treciendo nos hendenan mas cerca di otro cu alegria, comodidad y siguridad, contribuyendo na e desaroyo di turismo y e economia den henter e region”.

Ronella Croes, CEO di Aruba Tourism Authority (A.T.A), a expresa su entusiasmo riba e decision strategico y a afirma: “E vuelo inaugural entre São Paulo y Aruba ta un logro excepcional cu ta refleha nos compromiso cu diversificacion y fortalece nos relacion cu e mercado Latino Americano. Esaki ta habri un porta nobo entre Brasil y nos isla, no unicamente facilitando e acceso sino tambe door di posiciona Aruba como un destinacion preferi pa e Brasileronan den Caribe. Pa medio di stabilisa e mercado di Colombia, e enfoke awo ta riba e mercado Brasilero, conhuntamente cu Argentina, Chile y Peru. Cu pronostico cu ta indica un crecemento positivo y un strategia enfoca den atrae bishitante di balor halto y cu menos impacto, nos ta sigur cu e momento aki lo marca un era nobo pa e turismo di Brasil na nos isla”.

Jo-Anne Arends, Aviation Business Development Executive di AAA, a destaca e importancia di e ruta nobo y afirma: “Nos ta masha encanta di yama GOL Airlines bonbini como e di 28 aerolinea na aeropuerto AUA, marcando nos di 32 ruta nonstop. Latino America tin tres hub principal: Panama City (PTY), Bogotá (BOG) y Lima (LIM)— y nos tin e placer di mira un servicio directo for di un di nos mercadonan di mas grandi y e aeropuerto di mas grandi den e region esta São Paulo (GRU). E servicio di GOL no ta djis facilita e biahe di e pasaheronan

desde Brasil, pero tambe ta conecta un tercera parti di e trafico di vuelo pa Argentina. Nos ta anticipa e impacto positivo cu esaki lo tin riba nos conexion y turismo”.

Detaye di vuelo                                                                                                                                    E servicio nobo lo opera haciendo uzo di un avion Boeing 737-8 MAX cu capacidad di 176 asiento. E orario di vuelo ta lo siguiente:

• GRU pa AUA: Ta sali 3:30PM y ta yega 9:00PM
• AUA pa GRU: Ta sali 10:30PM y ta yega 5:50AM  

Ticket ta obtenibel riba e website di GOL: www.voegol.com.br/en, app y pa medio di agencianan di biahe. E pasahero por scoge entre GOL Premium Economy Class, ofreciendo mas espacio pa pia y espacio pa “recline” of Basic Economy.

Tocante Brasil                                                                                                                      São Paulo, e metropoli di Brasil, awo ta djis un vuelo directo leu for di Aruba. Conoci como e centro financiero di Latino America, São Paulo ta conta cu un diversidad cultural, un escena artistico vibrante y un gastronomia di renombre mundial. Su atmosfera dinamico y su habitantenan acogedor ta hacie un destinacion fascinante pa e biaheronan.