Prome Minister Evelyn Wever-Croes : AMI NUNCA TAWATA TIN RADIO DI POLIS
“Mi ta kere cu Mike Eman a bay cu ne su cas na aña 2017 ora el a laga Bestuurskantoor full bashi”
ORANJESTAD — Mientras cu Aruba henter ta den ambiente di paz y trankilidad preparando pa Pasco, cierto prensa comprometi pa daña ambiente cu nan engaño, den nan website ta remaraca cu Prome Minister Evelyn Wever-Croes lo tin radio di Polis. Ta di lamenta cu ni riba dianan di fiesta nan por stop di gaña!
Prome Minister, igual cu Minister di Husticia Rocco Tjon, ta refuta esaki y ta declara cu e tampoco tin un portofoon di Polis.
“Ami nunca a haya radio di Polis. Mi ta kere cu Mike Eman a bay cu ne su cas na aña 2017 ora el a laga Bestuurskantoor full bashi! Por cierto ningun minister tin radio di Polis. Esaki ta fake news UN BIAHA MAS di esnan cu si a wordo haya culpabel di metemento den asuntonan regarda cu portofoon y cu no por respeta diananan importante di fiesta nos dilanti”, Prome Minister a expresa.
MINISTER ROCCO TJON TA REFUTA CU GOBIERNO TIN PORTOFOON DI POLIS
“Comisario di Polis sr. Robert Candelaria a confirma mi cu ningun hende di Gobierno tin un portofoon”
ORANJESTAD — Minister Rocco Tjon ta refuta cu gobierno tin portofoon di Polis. Esaki en conexion di remarcenan cu cierto prensa a trece dilanti. Minister Tjon ta declara:
“Como Minister di Husticia y Asuntonan Social, responsabel pa Cuerpo Policial, mi por garantisa cu ningun Minister, NI AMI MES como Minister di Husticia tin un portofoon! Ademas nunca mi tawata tin un portofoon, pasobra no tin necesidad pa cu esaki.
Mi a tuma contacto cu Comisario di Polis sr. Robert Candelaria y e a confirma mi cu ningun hende di Gobierno tin un portofoon. Cuerpo Policial ta maneha tur cos cu tin di haber cu portofoon y nan tin un registro tambe pa cu esaki.
