Ryçond do Nascimento: Patrick su ‘hit-and-run’: un atake riba husticia

Nos niun ta perfecto. Nos tur ta pecador. Sin embargo, nos tin un gran deber: pone berdad riba un pedestal y lucha pa husticia prevalece. E motibo ta obvio: sin husticia un pais no por prospera y sin husticia un pais no por sali for di pobresa.

Pero, institucionnan politico y economico cu ta integro no ta aparece como por arte de magia. Nos mester esforsa nos mes pa crea un estado honesto y un economia husto. Nos mester spera resistencia, pasobra tin un elite politico y financiero cu no kier mira reforma. Un elite cu ta existi door di horta patrimonio di pueblo y concentra poder y rikesa den nan man.

E elite no ta worry cu pueblo ta keda stanca den pobresa financiero y spiritual. E sistema corupto no ta worry cu progreso. E ta unicamente preocupa cu avansa y proteha su existencia. P’esey e elite aki semper ta fomenta un cultura di miedo y un cultura di manipulacion sentimental di pueblo. Cu miedo y manipulacion nan ta silencia bosnan cu ta pone nan existencia na peliger. Asina e elite aki a posiciona su mes como enemigo di husticia.

P’esey mi ta keda combati Patrick Paskel y 24ora, pasobra nan a posiciona nan mes como enemigo di husticia. E motibo ta cu Patrick mes ta pertenece na e elite cu tin poder politico-financiero. 24ora ta e prome den noticia y tin e audiencia di mas grandi. Esey ta duna nan placa y poder politico, pero pa yega na e haltura cu nan ta, Patrick a bende su bos na interesnan personal den un sistema di patronahe politico: “cani mi pa mi cani bo”. P’esey nos mester keda alerta pa e señalnan di comunicacion corupto, diseña pa hunga cu nos emocion y pone nos kere den e agenda di “un man ta laba otro”. Cu su echonan e ta bendiendo amor pa fabornan politico y odio contra husticia, manera e articulo cu 24ora a publica dia 29 di december ultimo cu e titulo: “Tanto drama pornada: Homber cu a mata hende cu auto y despues huy…ya ta liber!”

Con Patrick a skirbi e “hit-and-run”

Mi ta supone cu ta Patrick mes a skirbi e articulo di dia 29 di december 2024. Echo ta cu el a (permiti) publica e articulo y a broadcast e. Pero, e pregunta mas interesante ta con e articulo a wordo skirbi? Patrick mester a bay sinta riba su stoel tras di su lessenaar. Como cu e ta un homber chikito, di bayna su pianan ta touch vloer. E ta mira e pantaya gigante di su computer. Mientras e ta dal un slok di su Old Parr (Superior?) y e ta cuminsa busca e articulonan y potretnan den e database di 24ora relata na e caso. Den su mente e ta cuminsa organisa kico e kier bisa. Asina e ta percura pa menciona e accident fatal, e “hit-and-run” di un sospechoso cu a causa e accidente y e echo cu e persona a huy. Patrick ta sinti cu e mester recorda e lector di e manera dramatico cu husticia a haya y gara e sospechoso. Asina e tin tur e puntonan cu e kier activa pa trece como noticia cu awo, despues di 16 dia di detencion e sospechoso a ser lag’e liber pa warda su caso bin dilanti di hues. Patrick por a stop eynan. Cu apenas 220 palabra e por a trece tur aspecto relevante pa noticia. Sin embargo algo mester a trigger e psicologicamente, pasobra e palabranan cu e articulo ta uza ta instiga odio contra e Procurador General, Amalin Flanegin, comosifuera cu e ta un persona cu no tin sentimento ni curason. Lesa e palabranan di Patrick pa bo mes: “Obviamente mata hende cu auto y huy despues awo no ta un crimen mucho pisa mas pa nos Procurador General.” Pero e veneno mes ta wordo reserva pa e conclusion di e articulo, cu ta bisa lo siguiente: “Cu un comportacion asina di husticia, ta confirma cu bida di hende no tin balor pa nan. A tene cuenta cu e circunstancia personal di e sospechoso, a tene cuenta cu KIA ta yen pero no a tene cuenta cu e dolor cu a keda atras cerca famia di e victima. Cu cambio di gobierno, ta necesario un “doorlichting” completo den Ministerio Publico pasobra comunidad sigur no ta sinti cu ta persiguiendo malhechornan.”

Con Patrick ta uza e “hit-and-run” pa manipula

Ta hopi cos mester a pasa den e cabes y e curason di Patrick pa e (permiti) cuestiona e humanidad di e Procurador General y Ministerio Publico di e manera aki. E caso di Speed mester ta molesti’e. Ademas Patrick su sentimento anti-husticia no ta un secreto. Un ehempel ta con Patrick a uza e programa Enfoke pa bende cu Paul Croes y Benny Sevinger no a haci nada malo den nan funcion of con den e mesun programa Patrick a bende cu Ministerio Publico no tabata bon bezig den su persecucion di Benny.

E meta obvio di e articulo ta pa fomenta persecucion politico contra e Procurador General, manera cu gobierno nobo sinta. Patrick ta hasta indica con esaki mester wordo inicia: pa medio di un “doorlichting”. Cu esey e ta insinua cu despues di e doorlichting mester bin un reorganisacion, cu e ta spera cu lo resulta den despedida di e Procurador General. Pa yuda gobierno nobo bende e persecucion politico aki Patrick ta fomenta indignacion contra Procurador General y Ministerio Publico. E articulo ta uza varios arma retorico pa pinta supuesto fayonan na Ministerio Publico. E arma principal pa bende e acusacion ta e wega di hunga cu sentimento, door di enfatisa e dolor di e famia di e victima y insinua cu bida humano no tin balor pa husticia. Asina Patrick ta motiva e lesado pa perde confianza den husticia. Enfin, e meta di e articulo no ta pa informa, sino pa manipula.

Lucha contra desinformacion

E articulo tocante e “hit-and-run” no ta un caso aisla, pero ta parti di un patronchi repetitivo di indignacion selectivo y periodismo manipulativo. P’esey nos, como ciudadano comprometi cu husticia y progreso, mester keda alerta contra desinformacion y manipulacion. Nos mester cuestiona ken ta e autor, cua fuente e ta uza, kico ta su motibonan y ki narativa e kier bende. Nos mester busca perspectivanan alternativo, verifica reclamonan cu evidencia, y responsabilisa esnan cu tin poder periodistico y politico.

Pero nos no por para ey. Nos mester compromete nos mes cu e lucha pa sali na defensa di husticia y combati manipulacion. Duna sosten na periodismo independiente cu ta pone integridad na prome luga y cu ta boga pa transparencia den nos institucionnan. Cada paso nos ta tuma pa desenmascara desinformacion ta un paso mas cerca na un sociedad mas husto y un futuro mas prospero.

Hunto, nos por crea un cultura unda berdad ta reina riba oportunismo y unda e bos di pueblo ta mas fuerte cu e influencia di un elite corupto. Nos democracia ta depende di un pueblo critico y comprometi—nos ta e defensornan di husticia.