Partido MEP: PARTIDO MEP TA INVITA PUEBLO DI ARUBA PA SINTONISA E PROGRAMA “INTERES DI PUEBLO” DIASABRA PROXIMO
ORANJESTAD – Partido Movimiento Electoral di Pueblo MEP ta invita pueblo en general pa sintonisa e programa Interes di Pueblo diasabra awor dia 4 di Januari di 11 am te cu 1 pm. Durante e programa Joe Koolman como moderador lo tin como invitado lider di partido MEP, y Prome Minister demisionario Evelyn Wever-Croes cu lo reflexiona riba aña 2024 cu a termina y riba aña 2025.
Un tema hopi importante cu Lider di partido MEP lo toca ta e tema di pensioen di biehes. Aki e lo splica den detayes con Gabinete Wever-Croes I y II, durante e ultimo 7 añanan, a bin ta aumentando e pensioen di biehes 5 biaha sumando en total casi awg 400. Esaki sigur ta un muestra cu partido MEP ta bisa loke e ta haci, y ta haci loke e ta bisa sin manipulacion y promesa falso.
Durante e programa lider di partido tambe lo delibera riba e huramentacion di e 8 parlamentarionan di MEP diaranson proximo di cual 4 lo continua di ta den posicion di minister y di parlamentario pero bou un solo salario. Finalmente el lo toca e tema di e rekisitonan pa por bira parlamentario di cual un di nan ta cu a cumpli cu e ley di financiamento di partidonan politico y lo refleciona riba e tema di donacion y recaudacion di fondo di partidonan politico, specialmente riba esnan cu no a cumpli cu e ley debidamente.
Lider di partido MEP ta pidi pueblo en general pa no keda sin sintonisa e programa Interes di Pueblo diasabra dia 4 di Januari di 11 am – 1 pm na radio TOP FM 95 pa asina por ta informa debidamente riba e temanan cu lo cubri durante e programa aki.
