DVG ta informa riba Casonan di ‘Kinkhoest’ na Aruba

ARUBA- 03.01.2025. For di aña pasa diferente pais den e continente Europeo y Mericano a bin ta bati alarma riba aumento drastico di casonan di ‘Kinkhoest’ of tambe yama ‘Whooping cough’. Aruba como pais cu ta ricibi bishitante for di e diferente paisnan aki recientemente tambe a bin ta nota un aumento den e cantidad di casonan. Desde aña pasa te cu awor aki Aruba tin un total di 6 caso positivo registra, di cual 2 ta baby cu ta interna y uno ta hopi critico. 

‘Kinkhoest’ ta un malestar respiratorio cu ta wordo ocaciona pa un bacteria. Door di tosamento of nistermento un persona infecta por transmiti e bacteria aki y asina eta drenta e curpa humano via boca of nanishi. E prome sintoma di ‘Kinkhoest’ ta cuminsa similar na un griep regular unda e nanishi ta cuminsa core awa, tosamento leve, keintura y nistermento. Despues di e prome sintoma e malestar ta desaroya den tos severo y persistente, saca despues di tosmento y cansancio.

Pa e adulto, e hoben y mucha cu ta vacuna contra e bacteria aki ‘Kinkhoest’ ta wordo experencia como un simpel griep pero pa baby menor di 2 luna cu ainda no a ricibi nan vacuna DKTP, muchanan cu no ta vacuna of no ta vacuna optimalmente y e adulto mayor cu un salud fragil, “Kinkhoest’ por ta severo/mortal. Debi na e tos intenso e baby, mucha of adulto por cuminsa saca, asfyxia, perde conocemente y por fayece.

Durante luna di December 2024, Aruba a registra 3 caso di “kinkhoest” cual dos caso ta baby bou di 1 aña di edad. Esaki normalmente ta un average pa aña di e cantidad di “kinkhoest” registra na Aruba. Den ful 2024, un total di 6 caso confirma di “kinkhoest” a wordo registra.

Di parti DVG nos ta alerta comunidad pero particularmente mayornan cu baby chikito cu no a ricibi nan prome vacuna ainda pa evita di expone nan baby na demasiado persona of na personanan cu tin sintoma di griep. Na personanan cu ta experenciando sintomanan respiratorio ta conseha pa nan proteha un otro door di bisti tapa boca. Tambe e adulto mayor cu salud fragil mester ta conciente y practica hygiena di man frecuentemente pa evita di transmiti e bacteria of keda infecta cu esaki. Ta conseha pa laba man prome cu come y semper prome cu mishi of duna cuido na baby chikito. Pa e hende muhe na estado ta recomenda pa e vacuna contra ‘kinkhoest’ entre  27 y 36 siman di embaraso pa di e forma aki su baby por nace cu poco immunidad pa e bacteria.  

Departamento di Salud Publico dentro di e siguinte dianan lo sigui informa comunidad debidamente riba desaroyo di e casonan na Aruba.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw