Hunto HOH y Ecogas cu paso significante pa un futuro mas sostenibel y saludabel

Riba 30 di December 2024, Horacio Oduber Hospital (HOH) a firma cu orguyo un acuerdo transformativo cu e compania Ecogas pa e implementacion di un proyecto “turnkey” cu tin como meta pa mehora e sistema di energia di Hospital. E proyecto aki lo bay converti e sistema di consumo, awo basa riba diesel na HOH, pa un sistema moderno di boiler di gas di petroleo likido conoci como LPG.

E proyecto aki ta start sali durante e prome kwartaal di 2025 y ta spera cu e lo ta cla dentro di un plaso di seis luna. E timeline aki ta enfatisa e compromiso cu tur dos partido tin pa yega na un solucion eficiente y sostenibel mas lihe cu ta posibel den loke ta energia.

Cu e transicion pa e sistema LPG, HOH lo logra spaar di forma significante pa loke ta gastonan operacional, loke ta bay permiti pa Hospital por inverti mas fondo den eleva calidad di cuido di pashent y amplia di servicio medico. LPG no ta solamente costo efectivo, pero e sistema ta conoci pa e balor agrega cu e tin pa loke ta nos medio ambiente. Ademas, e sistema di LPG ta rekeri menos mantencion, loke ta mehora e eficiencia y siguridad di e parti operacional di Hospital.

E acuerdo aki ta demostra e dedicacion cu HOH tin pa loke ta sostenibilidad y innovacion, loke ta alinea cu nos mission pa keda amplia y adopta practicanan cu ta beneficia nos medio ambiente y nos comunidad. Hunta di Directiva, management y staf completo di HOH ta extende palabranan di gratitud na e compania Ecogas pa nan apoyo, experticio y compromiso pa sigura cu e proyecto aki cu ta asina importante ta uno exitoso.