Prome Minister Evelyn Wever-Croes: REBAHONAN CONSIDERABEL DI IMPUESTO PA 28 MIL CIUDADANO
Debi na e espacio financiero cu Gabinete Wever-Croes a crea:
ORANJESTAD – Diamars atardi durante confrencia di prensa di Gobierno di Aruba, Minister di Finansa Xiomara Maduro, a duna un splicacion amplio riba e rebaho di inkomstenbelasting y loonbelasting pa 2025. Na su turno, Prome Minister Evelyn Wever-Croes a duna un recapitulacion di e presentacion enfatisando cu e rebahonan di impuesto cu ta wordo proponi y cu lo bin na vigor inmediatamente cu forsa retroactivo di te cu 1 di Januari 2025, ta bay nifica un cambio considerabel den e cantidad di clientenan cu ta bay haya nan cu no mester paga loonbelasting riba salario of inkomstenbelasting riba entrada.
Prome Minister a splica cu na momento cu Gabinete Wever-Croes a drenta gobernacion e total di persona cu mester a paga e belasting aki tabata 40 mil. Cu e cambionan aki, e cantidad di persona cu ta sigui paga e belasting aki ta apenas 12 mil. Cu esaki Gobierno ta trece alivio den e peso di impuesto y tambe den e trabounan cu mester wordo haci pa yena e formularionan cada aña, mirando cu ta un total di 28 mil persona lo no mester yena e formulario, ni paga e belasting aki mas.
E parti mas interesante ta e desaroyo den e pensionadonan. Cu e cambio aki na vigor, di e 19 mil pensionadonan cu ta biba na Aruba, solamente 2 mil y pico lo sigui paga e impuesto aki pero na un tarifa mas abou. Aki ta trata di pensionadonan cu tin mas entrada cu solamente nan pensioen.
“Cu esaki nos ta considera nos compromiso na nos pensionadonan pa elimina e belasting riba e prome y e di dos pensioen como cumpli na un forma responsabel. Esaki sigur tabata nos meta di comienso di gobernacion pero debi na e situacion financiero prome y despues di pandemia esaki no tabata posibel. Awor cu nos a logra esaki y a logra crea espacio financiero, nos por duna e alivio aki na nos pensionadonan aki.
Mi ta gradici nos profesionalnan di departamento di impuesto cu desde e prome dia a traha riba tur e retonan aki na un forma responsabel, haciendo tur analysis necesario pa asina tin un bista riba e impacto di cada decision. Y danki na e trabou grandi di e profesionalnan aki, Gabinete Wever-Croes por a goberna e pais aki na un forma responsabel.
Tambe mester menciona cu tur esaki tabata posibel, danki na e vision, determinacion, y curason di Minister di Finansas Xiomara Maduro, cu no a descansa te ora a logra na trece e alivio aki.
Mas sigur hopi lo bisa, cu awor despues di eleccion nos ta bin cu e alivio aki. Ta importante pa menciona cu Gabinete Wever-Croes no ta traha solamente pa e siguiente eleccion sino pa e siguiente generacionnan. E proyecto aki mester a tuma su tempo y a tuma su tempo, y si nos lo tabata den Gobierno ainda te cu Juni 2025 manera mester tabata, lo e lo a cay dentro di e trabounan cu nos Gobierno lo a completa. Eleccion ta tras di lomba, pero esey no ta kita cu nos ta contento cu awe nos por duna e alivio aki y por introduci e cambionan aki pa asina duna bek na comunidad, awor cu hunto cu henter e pueblo nos a crea e espacio financiero.
Danki na tur ciudadano di Aruba pa bo confiansa y pasenshi, y spera cu esaki lo duna e alivio cu nos ta buscando pa cada ciudadano di pais Aruba. Bou di Awg. 64 mil, no lo paga belasting mas ni riba salario, ni riba entrada. Esaki ta algo cu hopi pais no tin. Masha danki na tur nos profesionalanan y pabien Aruba cu e gran logro aki”, Prome Minister a expresa.
