Presentacion di obra literario ‘Di Carigueña pa Santa Clara’ di autor Jossy Tromp na Biblioteca Nacional Aruba

Diahuebs, 23 di januari di 6.30 pa 9.00 p.m. lo presenta e obra literario

‘Di Carigueña pa Santa Clara’ na Biblioteca Nacional Aruba, George Madurostraat, Oranjestad.

Autor Jossy Tromp a nace na Aruba, aña 1954. Su isla natal, unda e cu su famia ta biba, a sirbi como inspiracion pa skirbi diferente obra di cuenta ficticio cortico, poesia y un obra di teater. Tambe a sali for di su pen dos documentario historico deportivo Arubano. Tur ta obra skirbi na Papiamento, su idioma materno. E obra di ficcion ‘Di Carigueña pa Santa Clara’ ta e prome novela di Jossy Tromp, tambe na Papiamento.

E temanan cu ta bin dilanti den e obra di ficcion aki, basicamente ta trata e lucha continuo entre bon y malo, por cierto un tema clasico, cu e biaha aki ta toca turno pa tuma luga na Carigueña y Santa Clara, ambos localidad ta ficticio.

En conexion cu presentacion di e obra ‘Di Carigueña pa Santa Clara’ sr. Mirto Laclé lo duna un introduccion.

Sr. Wim Rutgers lo ta presente pa duna un charla.

Tambe sr. Joe Fortin lo comparti hunto cu autor sr. Jossy Tromp nan experiencia cu produccion y lesamento di e obra.

Sr. Ralph Croes lo lesa algun fragmento di e obra.

Pianista Joey Wing, di apenas 16 aña, lo entretene publico cu algun piesa musical.

‘Di Carigueña pa Santa Clara’ ta un storia ficticio cu ta explora virtud y bicio di e bida cotidiano na Carigueña y Santa Clara. E protagonistanan principal ta dos ruman homber cu como adolescente a mira un pelicula tocante un pueblo cu ta biba bou di un regimen totalitario. Despues cu capital grandi a descubri Carigueña, el a conoce un desaroyo economico impresionante y consecuentemente a chupa den su campo di gravitacion miles y miles di inmigrante for di tur parti di mundo. Cu nan sodo, Carigueña a bira un micronacion prospero, cu for di trempan caba tabatin un gobernacion cu su reisnan bon hancra den e balor- y principionan democratico. Pero manera sa pasa den tur sistema di gobernacion di un pais, sea cual sea e ideologia di gobernantenan, semper ta mira nan mes como esnan cu tin e berdad na nan banda. A base di e creencia opaco aki, nan ta bisa cu nan lo haci nan maximo esfuerso pa goberna e pais debidamente y sirbi e pueblo mas miho cu ta posibel. Sinembargo, e realidad ta otro mayoria biaha.

Pareu cu e bida di tur dia ta sigui su curso di custumber, e dos rumannan ta biba un bida intenso y profundo. Y, e descenlase di e teatro surrealista cu yama ‘Di Cargueña pa Santa Clara’ ta tuma luga, … te yega na su climax.

E buki lo ta na benta. Percura pa bo tin e buki aki den bo coleccion.