KVK A TENE SU KICK OFF MIXER Y MEET THE BOARD 2025
Oranjestad – Camara di Comercio y Industria Aruba (KvK) a organisa su prome evento pa aña 2025, diahuebs 23 di januari. Manera ta custumber, na comienso di aña, KvK ta organisa un evento caminda invitadonan, tanto di sector priva como tambe di sector publico, ta bini hunto pa socialisa y na mesun momento por cera conoci cu e directiva nobo di KvK. KvK ta haya importante pa socialisa y mantene contacto cu stakeholders di sector priva y tambe sector publico y alabes probecha e momento pa gradici un y tur pa e bon comunicacion y cooperacion ricibi durante e aña cu ta tras di lomba.
Manera ta custumber, e Presidente eligi ta comparti algun palabra cu e publico, y un biaha mas a toca turno na Sr. Diederik Kemmerling, Presidente ya pa dos aña consecutivo, cu a gradici tur presente pa atende e evento y a comparti su vision y punto di bista di con e lo percura pa hiba maneho durante su temporada como Presidente hunto cu e demas miembronan di directiva. Durante su speech, sr Kemmerling a presenta e Plan Strategico 2025 di KvK cu tin un vision cla y enfoca riba e futuro. E prioridadnan den e Plan Strategico ta inclui boga pa un ambiente di negoshi mas faborabel y representa comerciantenan den retonan, facilita oportunidadnan di networking pa comerciantenan, sostene y stimula hobennan empresario, colecta y analisa datonan riba e retonan den comercio, y desaroya conexion mas solido cu gobierno y otro stakeholdernan.
Siendo e organisacion y cuerpo representativo di comercio na Aruba, KvK continuamente ta percura pa fortalece laso cu sector comercial, brindando e apoyo necesario tanto na startups como tambe na negoshinan existente. Pa logra esaki ta sumamente importante pa traha conhuntamente cu partners relevante y mantene e contacto y bon relacion.
Banda di e tareanan asigna pa ehecuta, KvK lo sigui duna importancia na brinda informacion y guia na su clientenan, entre otro pa medio di organisacion di varios sesion informativo y educativo riba topiconan relevante cu ta mantene e empresario al tanto di aspectonan cu ta importante den e area di business.
Por ultimo, Sr. Kemmerling a comenta cu lo sigui eleva negoshinan local pa medio di trainingnan, comprondiendo e desafionan den comercio (e.o. impuesto y empleo), y colaboracion internacional y misionnan comercial. Alabes lo eleva e conexion cu gobierno pa medio di brainstorm, discuti y duna conseho riba desafionan den comercio.
KvK ta contento cu e Kick Off Mixer y Meet the Board 2025 tabata un exito y ta gradici tur su invitadonan pa nan presencia, y ta spera cu e aña aki KvK lo por organisa mas evento, reunionnan, training y charla pa comercio pa asina por ta mas cerca di e comerciantenan pa por haya nan feedback y asina tin un bista mas amplio di e retonan, preocupacionnan y deseonan cu ta reina den sector priva.
