Prome Minister Evelyn Wever-Croes: “E ESPACIO FINANCIERO CU GABINETE WEVER-CROES A CREA LO YUDA ARUBA YEGA NA SOLUCIONNAN PA CU E RETONAN DEN FUTURO”

Prome Minister despues di e simposio di CBCS

ORANJESTAD – Diabierna mainta, Prome Minister Evelyn Wever-Croes tabata presente na e simposio organisa pa Banco Central di Corsou y Sint Maarten (CBCS). E simposio aki tabata pa elabora riba e tema principal di ki efecto Gobiernonan tin riba e economia.

Prome Minister a indica cu e prome topico di e mainta aki tabata basa riba e sostenibilidad di e seguro social di e paisnan. Presente pa Aruba tambe tabata señora Daniëla van den Berg di Banco Central di Aruba, cu a duna un tremendo presentacion elaborando riba e sistemanan di Aruba, di AOV cu ta e pensioen di biehes, y di AZV.

Prome Minister a expresa cu despues di a scucha e presentacionnan, por realisa cu Aruba, Corsou y Sint Maarten ta enfrenta e mesun retonan, y pa por logra sali afor, lo ta di gran beneficio pa e paisnan aki uni y traha hunto.

Tambe a bin dilanti e tema di “vergrijzing” na unda cu e generacion di awor ta hayando menos yiu y e populacion ta birando mas grandi. Na Aruba e sistema di pensioen di biehes tin un sistema di seguro medico AZV cu ta di opinion cu e generacion cu ta activo y trahando ta esun cu tin cu carga y paga e premienan pa asina na un edad avansa nan por probecha di e pensioen di biehes y di e seguro medico, y esaki ta un reto grandi na Aruba.

Un di e solucionnan pa cu e problema aki ta mas migracion di personanan hoben, of pa esnan cu actualmente tin un edad mas hoben haya mas yiu. Ambos ta temanan cu mester sigui papia riba nan, mirando cu Hulanda ta poniendo presion riba Aruba, Corsou y Sint Maarten pa revisa e sistemanan y con sostenibel nan ta.

“Un conclusion sigur ta, cu bo so no por regla esaki. Un cos si ta cu na Aruba nos tin hopi beneficio door cu nos economia ta creciendo. E espacio financiero cu Gabinete Wever-Croes a traha y e surplus lo yuda nos pa yega na solucionnan den futuro”, Prome Minister a expresa.