Reaccion riba noticianan tocante caso Flamingo

Ministerio Publico a entrega apelacion awe contra e sentencianan cu Corte den Prome Instancia a dicta den e caso Flamingo contra e sospechosonan O.O. y E.F.E.

Huez a dicidi riba 22 di januari ultimo cu Ministerio Publico tabata den su derecho pa persigui e sospechonan den e investigacion Flamingo.

Otro cu loke e sospechosonan a bisa, Huez a dicidi cu Landsrecherche y Ministerio Publico a actua conforme cu ley durante e investigacion y e persecucion di e sospechosonan.

Huez a declara E.F.E. liber di tur tres acusacion cu Ministerio Publico a pone contra dje.

O.O. tambe a wordo declara liber di algun acusacion.

Sinembargo, Huez a declara O.O. culpable di complicidad di fraude, di un intento di fraude contra Pais Aruba y di abuso di su funcion como Ministro, y a condene na un castigo di 365 dia di prison, di cual 319 dia ta condicional y e castigo maximo di trabou pa comunidad di 240 ora.

Alavez O.O. a wordo priva di su derecho pa sirbi como un funcionario publico pa un periodo di 3 aña.

Den Prome Instancia O.O. a wordo priva tambe di su derecho pa vota pasivamente pa 3 aña. Pero e medida aki no por wordo impone riba dje, pasobra Huez a declara O.O. liber di corupcion pasivo.

Ministerio Publico no ta di acuerdo cu e vrijspraaknan den e casonan aki y tampoco cu e castigo cu a wordo impone riba O.O. y pesey a bay den apelacion.

Mas leu, Ministerio Publico a bin ta tuma nota di noticianan cu ta sali den medionan di comunicacion tocante e caso aki.

Ta purba pinta un imagen den prensa di un Ministerio Publico cu a faya y cu ta tuma decisionnan basa riba escogencianan politico y tampoco no ta duda pa ataca Fiscalnan di Husticia y Procurador-General personalmente.

Huez a determina cu Ministerio Publico a actua conforme cu ley den Flamingo y a condena e sospechoso principal den e caso aki, O.O., criminalmente y segun e mesun ley.

E critica cu ta wordo expresa den medionan di comunicacion na e momento aki ta sin fundamento y dañino pa Estado di Derecho democratico na Aruba.

Tur Fiscal di Husticia na Aruba – pero tambe na otro parti den Reino – ta forma parti di poder hudicial. Un poder cu ta independiente.

No solamente Hueznan, pero tambe Fiscalnan di Husticia ta actua independiente di politica. Nan a haci un huramento of un promesa pa sirbi Pais Aruba.

E ponencia den prensa cu Fiscalnan di Husticia y PG lo no ta actuando magistralmente, ta sin base y ta haci daño na e confiansa di ciudadanonan di Aruba den gobierno en general y den Ministerio Publico en particular.

Ministerio Publico ta haci un yamada na medionan di comunicacion na Aruba pa basa nan noticianan y otro declaracionnan publico riba hechonan cu a wordo verifica y caminda a haci uso di scucha y replica, y no pa plama opinionnan sin base y falsedadnan cu ta desinforma e pueblo di Aruba.