Fraccion di PPA no lo aproba presupuesto 2025 si esaki no tin recortenan substancial den gastonan

Otmar Oduber, lider di fraccion di PPA den Parlamento, a indica cu tanten cu prespuesto 2025 no refleha recortenan substancial den e gastonan di operacion di gobierno, no lo aproba esaki. E ta di opinion cu no ta husto cu mientras pueblo mester paga un aumento barbaro di 35% den gas, gobierno di su banda no ta baha su gastonan. Laga esaki ta un mensahe cla y raspa pa e gobierno nobo cu tin cu sinta. Pio ainda, e ta bisa cu Minister di Economia Wever no tabata y no ta sincero cu pueblo.CFT den su carta ta indica cu atrobe parlamento no a trata e presupuesto di 2025 manera palabra den acuerdonan entre e organonan. No ta importa si ta formando gobierno of no, fraccion di PPA ta di opinion cu un presupuesto mester wordo trata na tempo, un gobierno mester funciona debidamente y corectamente conforme reglanan y leynan di comptabilidad y conforme acuerdonan cera.Aruba ta caminda cu nos ta na e momentonan den e relacion cu Hulanda netamrnte paso Aruba no ta cumpli cu su palabracionan. Tur gobierno di turno a priminti, pero no ta cumpli cu e promesanan haci y ta crea e ora e desconfianza cu ta existi awe entre gobierno di Hulanda y Aruba. “Pesey como fraccion di PPA y mirando loke a tuma luga aworaki cu e aumento drastico di 35% den gas, cual lo bay tin un aumento ainda mas drastico den prijs di consumo di cuminda, ta imposibel pa aproba cualkier presupuesto cu wordo presenta cu no ta mustra y refleha un reduccion substancial den e gastonan di gobierno”.Otmar Oduber a menciona cu PPA ta kere cu mester yega na un 10 pa 12% di reduccion di gastonan di gobierno y cu tin espacio tambe pa logra esaki, si tin e boljntad. E no por kere cu no ta anuncia un reduccion den presupuesto, pero si ta anuncia un aumento drastico di gas, inclusive prome cu a forma gobierno. “E tipo di cosnan aki ta yega un momento cu como Parlamento mester manda un mensahe bon cla pa e gobierno cu ta sali y esun cu ta drenta, cu nos ta para tras di e compromisonan haci cu e comunidad di Aruba y cu nos ta bay defende tanto e interes como e derecho di pueblo manera cu tur partido y politiconan a priminti 2 luna pasa den eleccion”.