Segun Fraccion di PPA den Parlamento : Aumento drastico den gas ta un bofta traicionero den cara di e pueblo di Aruba

Mirando e bofta traicionero cu pueblo a haya cu aumento drastico di gas, fraccion di PPA ta puntra su mes si ta esaki pueblo tin cu verwacht di e gobierno nobo si continua cu e mesun minister di economia. Un minister cu a sconde e aumento aki pa pueblo prome y durante di eleccion. Loke ta mas condenabel di e aumento di 35% den prijs di gas ta cu e mandatario sa cu esaki lo ocasiona un efecto aun mas grandi riba e prijs di cuminda y alimentacion.

Esaki ta loke mas ta resalta pa e parlamentario, es decir, un persona cu ta fungiendo como minister di economia y dos luna pasa cu tabatin eleccion no a notifica pueblo cu lo bay tin un aumento drastico den tarifa di gas. “Bo tabata sa caba cu nos ta papiando di riba 40%, pasobra realidad ta cu kier a subi prijs di gas cu casi 45%, sinembargo a scohe pa subiele cu 35%. Esaki ta algo cu bo no ta haya sa ayera, ta algo cu bo tabata sa prome cu eleccion”, Otmar Oduber ta declara.

Despues cu a bay eleccion y cu posiblemente lo forma parti di un coalicion di un gobierno cu lo sinta, y segun medionan di comunicacion, lo continua como minister di Economia, esaki ta simplemente tuma pueblo haci. Tur partido durante eleccion, incluyendo esun di Sr. Wever, a mustra cu costo di bida ta haltisimo na Aruba y na ningun momento e la bisa pueblo cu tin mas medida na caminda. Despues di esaki, ta implementa un aumento di 35% cu lo significa riba consumo principal di pueblo cu ta cuminda, un aumento sumamente halto y cu ta inaceptabel.Otmar Oduber ta puntra su mes “con serio bo por ta como politico pa a manipula un pueblo di e forma aki y awe bo ta purbando di forma un gobierno”. Finalisando e la bisa cu mientras cu no wak cu gobierno ta mara faha y presenta recortenan substantial den su gastonan, fraccion di PPA no lo aproba presupuesto 2025. “No por ta asina cu ta impone mas medida riba pueblo y den cas mes ta sigui sin baha gasto”.