SETAR comprometi cu Fundacion Ban Uni Man Pa Cria Nos Muchanan

Diaranson mainta SETAR a otorga un check di AWG 5.000 na representantenan di Fundacion Ban Uni Man Pa Cria Nos Muchanan. SETAR desde 2019 ta un partner strategico di e fundacion pa provee nos muchanan di menos recurso desayuno na scol.

Un programa cu a cuminsa na e aña escolar 2001/2002, ofreciendo 138 mucha un desayuno, esta un sandwich y un juice of lechi, tur dia na scol. Actualmente e fundacion ta provee desayuno pa 800 mucha. Sr. John Fun, presidente di e fundacion, a comparti cu desde e pandemia di Covid-19 a mira un crecemento den e cantidad di 650 pa 800 mucha di scolnan rond nos isla incluyendo muchanan di traimerdia.

SETAR, como nos compania nacional di Telecomunicacion, ta contento di por sigui aporta na Fundacion Ban Uni Man Pa Cria Nos Muchanan pa nan por sigui cu e bunita meta di provee nos muchanan desayuno tur dia na scol, cu ta esencial pa nan crecemento y desaroyo.