Prome Minister Evelyn Wever-Croes: GABINETE WEVER CROES COMO GOBIERNO DEMISIONARIO LO SIGUI ATENDE TUR TEMA CORIENTE Y CU NO POR TARDA

“Si e supervision financiero y Hulanda haci su trabou debido, Aruba no ta suppose di “de-rail” pasobra nos ta riba e “rails” di finansas publico sostenibel y responsabel”

ORANJESTAD – Prome Minister Evelyn Wever-Croes a indica cu Gabinete Wever-Croes II ta un Gobierno demisionario, pero lo sigui atende tur tema coriente y tur tema cu no por tolera pa tarda. Esaki no ta un asunto cu si Prome Minister kier of no kier sino cu mester atende e temanan aki cu ta di suma importancia.

Un tema hopi importante y coriente ta e negociacionnan cu Hulanda, pasobra esaki a cuminsa hopi prome cu Gobierno a cay. E temanan aki no por wordo posponi pasobra 1 di Mei 2025 ta den porta cu of sin Gobierno. Esaki ta un acuerdo haci cu Hulanda y Aruba a duna su palabra di cumpli pa e fecha stipula.

Prome Minister a expresa di a scucha expresionnan bisando cu su persona a bay Hulanda pa “pret”. esaki sigur no ta e caso, su persona a biaha pa Hulanda mirando e necesidad pa atende varios tema importante, incluyendo e negociacionnan.

“E ta hopi importante pa un Gobierno semper dialoga personalmente cu Hulanda, na unda por wak nan cara y asina yega na miho acuerdo pa pais Aruba. No mester pleita ni grita of recuri na welga di hamber pasobra awe ainda tur hende ta corda e “welga di hamber” di ex Prome Minister Eman.

Realidad ta tambe cu na Den Haag tin un nerviosismo pa e Gobierno nobo cu ta bay bin y pa e maneho financiero cu e Gobierno nobo aki lo bay hiba, mirando loke ya nan a pasa den durante e añanan 2009-2017 cu a conduci na un “Koningklijk Besluit (KB), y na curatela di Aruba.

E ta un berguensa cu despues di 7 aña e “welga di hamber” ta loke nan ta corda y ta causa e nerviosismo entre nan. Mi a haci mi best na purba di calma nan y splica cu Gabinete Wever-Croes a haci lo posibel pa Aruba ta financieramente stabiel. Si e supervision financiero y Hulanda haci su trabou debido, Aruba no ta suppose di “de-rail” pasobra nos ta riba e “rails” di finansas publico sostenibel y responsabel”, Prome Minister a expresa.