Prome Minister Evelyn Wever-Croes: PROME MINISTER TA DUNA RESUMEN DI REUNIONNAN CU MANDATARIONAN HULANDES

ORANJESTAD — Prome Minister Evelyn Wever-Croes durante un entrevista cu nos planta Nacional TeleAruba, a duna un relato di reunionnan cu mandatarionan na Hulanda durante su biahe di trabou.

Minister President Dick Schoof

E prome reunion tawata cu Minister President señor Dick Schoof. Aki a toca varios tema di relevancia pa Aruba, specialmente siguridad y desaroyonan den e region cu ta afecta Aruba directamente. A trata di e prome reunion personalmente di e dos premier-nan. Por a tuma nota cu Premier Schoof ta bon informa y interesa riba desaroyonan na Aruba. Akinan e Prome Minister di Aruba a splica cu Aruba na e momento aki ta den un situacion financiero hopi stabiel y pa 3 aña sigui tin surplus financiero. Eynan den un manera di chiste e premier di Hulanda a pidi conseho di nos Prome Minister pa asina e tambe por crea surplusnan financiero pa Hulanda.

Minister di Buitenlandse Zaken Caspar Veldkamp

Hunto cu Minister Plenipotenciario Ady Thijsen, Prome Minister a reuni cu Minister di Buitenlandse Zaken señor Caspar Veldkamp. Aki a toca e temanan di Venezuela y con esaki ta afecta Aruba y tambe riba e desaroyo recien di e ordonan ehecutivo di e Presidente di Merca Donald Trump, unda algun di nan ta afecta Aruba directamente. Durante e reunion tambe Prome Minister a pone enfasis riba e importancia pa Hulanda por compronde kico cada decision di nan y Union Europeo ta significa pa Aruba.

Secretario di Estado di Relacionnan di Reino Zsolt Szabó

Tambe Prome Minister a reuni cu Secretario di Estado di Relacionnan di Reino señor Zsolt Szabó. A delibera riba diferente desaroyo pero principalmente e negosacionnan entre Aruba y Hulanda riba e tema di e refinanciamento di e debe di covid. Manera ta conoci awor Aruba ta pagando un interes di 5.1%. E condicion di e interes aki di 5.1% ta bou e condicion cu pa dia 1 di mei 2025, keda cla cu un ley di Reino y un ley na Aruba (landsverordering) cu lo wordo presenta na Parlamento di Aruba y Hulanda. Si logra esey e interes lo baha te na 3.4%. Mescos cu Aruba, di parti di Hulanda tambe nan opinion ta cu e negosacionnan ta bayendo den bon direccion.

“Nos lo sigui haci nos maximo esfuerso pasobra nos ta kere ta realistico pa nos keda cla prome cu 1 di mei 2025. Cu esaki no ta significa cu e ley di Reino ta un hecho sino cu e negosacionnan ta cla y tin un concepto riba mesa cu a haya conseho di Raad van State y Raad van Advies y lo bay na Parlamento di Aruba y Hulanda pa wordo debati. Asina Parlamento lo tin tur su tempo pa wak si lo acepta esaki. Pues no ta un acuerdo cu nos ta cera tras di lomba di Parlamento sino algo cu e gobiernonan ta negociando y prome cu 1 di mei mester wordo presenta na e parlamentonan”, Prome Minister a indica.

Aruba ta den un perdiodo di transicion

Tur reunion cu e mandatario di Aruba a informa cu Aruba ta den un periodo di transicion mirando cu tin un formacion andando pa un gobierno nobo. Akinan el a splica cu e diferente puntonan cu el a papia riba nan lo wordo hancra den su documento di transicion. Contrario na 2017, ora cu el a bira Prome Minister e no a ricibi niun sorto di transicion, ni documento. Prome Minister a indica cu su gabinete, Gabinete Wever Croes si lo haci un transicion manera mester ta y cada un minister ta trahando un documento di transicion. Den esey ta hancra, poni por escrito, palabracionnan cu e ministernan nobo por encontra cu ne.

Negosacionnan mester continua

Prome Minister: “Na e momento aki Aruba no tin un gobierno nobo ainda, y ora ta asina leu ainda lo tin e screening di cada minister cu ta un proceso cu por tarda algun siman y tin desicionnan cu mester wordo tuma mientrastanto, desicionnan urgente. E tipo di negosacionnan cu ta andando awor no ta cosnan cu por warda te ora un gobierno nobo bin, pero mester continua. Mi ta den contacto cu e formadornan tambe pa nan ta na altura di loke ta sosodiendo pa no tin sorpresa, pero principalmente pa tin continuidad.

Si ta un cos mi a siña di e Hulandesnan ta cu no ta importa cua gobierno ta na mando na Hulanda, pero continuidad ta importante. Si bo tin palabracionann haci cu un gobierno, e siguiente gobierno tin cu sigui cu ne. Nos ta den e fase awor aki cu Hulanda cu ta basta complica pero semper nos ta traha den e miho interes di pais Aruba y den e forma cu nos ta kere cu ta bay tin un sosten amplio”.