Fraccion di Partido MEP: PA DUNA CLARIDAD NA COMUNIDAD DI ARUBA CON TA PARA CU E AWG 700 CU EL A PRIMINTI NOS PENSIOENADONAN Y TAMBE UNDA TA PARA CU E RIJKSWET

Durante reunion den Parlamento, Parlamentario Wever-Croes ta pidi partido di Mike Eman (AVP)

ORANJESTAD – Dialuna mainta durante un reunion den Parlamento, Parlamentario y Lider di partido MEP Evelyn Wever-Croes a hiba palabra den e di dos tanda. Prome cu el a cuminsa cu su disertacion, el a tuma nota cu un Parlamentario cu conoce e reglanan di Parlamento hopi bon, a referi na su persona, y cu na ningun momento Presidente di Parlamento a hala atencion di e Parlamentario aki pa cord’e riba e reglanan. Tambe Parlamentario Wever-Croes a indica cu no ta aceptabel cu Presidente di Parlamento ta interumpi 3 di su coleganan na momento cu nan ta hibando palabra, pa un topico cu por a wordo referi na nan despues di nan disertacion, causando asina cu nan no tabata tin e tempo suficiente pa termina nan disertacion. Esaki no ta democracia, p’esey Parlamentario Wever-Croes ta pidi Presidente di Parlamento pa haci su trabou na un manera corecto y pa mantene democracia den e sala di Parlamento.

Promesa di Mike Eman riba aumento di pensioen

Na inicio di su disertacion, Parlamentario Wever-Croes a indica cu ta importante awor cu a fiha e comisionnan pa esnan encarga cu e comision di “ouderenzorgen” informa pueblo y tur nos adultonan mayor unda nan ta para cu e promesa di señor Mike Eman pa aumenta e pensioen di biehes cu Awg 700 den e prome 100 dianan di su gobernacion. Y cu esaki partido MEP kiermeen pa duna comunidad di Aruba claridad hopi lihe kico ta locual cu ta bay pasa cu e Awg 700 cu a wordo priminti na pensioenadonan.

Mike Eman a haci un promesa durante su campaña poltico, cu e tabata sa di antemano cu lo ta hopi dificil pa e cumpli cu ne. E tabata sa cu e aumento aki no ta posibel y toch a haci e promesa. Danki na e promesa aki, AVP a gana eleccion, pues AVP lo mester cumpli cu nos grandinan awor. E Parlamentario a expresa tambe cu nan kier wak e aumento di berdad y no den fase ni pa un par di luna so manera señor Valdes di OPPA a indica, pasobra esaki no tabata e promesa haci pa Mike Eman. Ta importante tambe pa partido FUTURO bin dilanti y duna nan posicion pa cu e aumento di pensioen aki mirando cu nan lo ta den un coalicion cu partido AVP cu a gana eleccion riba e promesa aki.

Parlamentario Wever-Croes a expresa cu te cu awe no tin niun informacion kico ta bay pasa cu e aumento aki y hopi ta esnan cu ta puntrando. Partido MEP tambe den nan funcion como miembro di e comision lo percura cu Mike Eman cumpli cu su promesa haci na e pensioenadonan.

Rijkswet

E tema di rijkswet ta un tema hopi importante. Partido MEP a pidi na mas di un ocacion, pa un reunion publico pa trata e tema aki, mirando cu a wordo bisa cu ta den un reunion publico so e partidonan lo durf di bisa unda nan ta para pa cu esaki. Respet mester bin di dos banda, si nos kier pa pueblo respeta e Parlamento aki, Parlamento mester respeta pueblo. Parlamentario Wever-Croes a indica cu tempo e tabata den oposicion, ta masha poco partido AVP cu tabata na mando tabata bin atende cu pueblo. Awor mirando cu nan a gana eleccion ta importante pa bin informa pueblo unda nan ta para cu e rijkswet. Gobierno di MEP a traha riba esaki y a crea e espacio financiero, awor e pregunta clave ta; si AVP lo bay haci lo corecto pa pais Aruba.