Parlamentario Evelyn Wever-Croes: TIN HOPI PREOCUPACION NA ARUBA Y HULANDA PA UN MAL MANEHO FINANCIERO NA MAN DI MIKE EMAN UN BIAHA MAS

A traves di e Comision di Finansas, Partido MEP lo salbaguardia interes general di Aruba y di su ciudadanonan

ORANJESTAD – Dialuna 17 di februari, durante un reunion publico di Parlamento di Aruba a trata e diferente comisionnan fiho. Apesar cu MEP a haya presidencia di solamente 1 di e 22 comisionnan, MEP a haya uno hopi importante cu ta e Presidencia di e Comision di Finansas.

Parlamentario Evelyn Wever-Croes, durante e reunion a hiba palabra unda el a expresa di ta sumamente satisfecho cu Fraccion di MEP a haya e Presidencia di e Comision di Finansas.

Finansas ta e yabi, y pa un parlamento haci e miho control di gobierno, e mester tin tur herment den man pa eherce e control. Finansas tawata un yabi den e ultimo gobernacion y lo ta e yabi di e siguiente gobernacion tambe. Fraccion di MEP, a traves di e comision aki lo salbaguardia interes general di Aruba y di su ciudadanonan.

Parlamentario Wever-Croes ta indica cu su persona den funcion di Prome Minister di Aruba, a caba di bin di un biahe di trabou na Hulanda unda el a hiba varios reunion cu mandatarionan Hulandes. Practicamente durante tur reunion, e por a sinti e neviosismo y preocupacion cu ta biba na Hulanda pa un posibel regreso di un gobierno di Mike Eman. Hulanda tin un mal experiencia cu Gabinete Mike Eman, y e welga di hamber di señor Mike Eman ta un tema cu keto bay ta bin riba mesa y ta algo cu ta trece preocupacion bou e Hulandesnan.

Tambe Parlamentario Wever-Croes ta subraya cu tin indicacion di personanan cu ta sigui e negosacionnan di e formacion di e gobierno nobo, cu partido FUTURO ta pidiendo pa e ministerio di Finansas pasobra nan no ta confia partido AVP cu finansas. Pero como sea, FUTURO lo no tin e influencia suficiente pa por “overrule” mal decisionnan cu lo bin un biaha mas financieramente di señor Mike Eman. Mescos den pasado cu señor Mike Eman no a laga señor Angel Bermudes, cu ta un persona di hopi respet y renombre, funciona como Minister di Finansa.

“Otro preocupacion cu tin na Hulanda ta e manera malo cu un integrante di AVP, presente den sala di Parlamento awe, a trata nos Gobernador di Aruba. Esaki ainda nan ta sinti’e na Hulanda. Tambe Hulanda ta preocupa cu tin algun integrante di AVP a declara cu nan ta bay “ruim op de boel” den Ministerio Publico. Segun Hulanda, e metemento di partido AVP den Ministerio Publico, aparentemente a cuminsa caba cual ta algo hopi preocupante. Esaki sigur ta algo cu e Comision di Husticia mester bay encarga di dje. Pues na e comisionnan cu a keda estableci, mi ta pidi pa pone enfasis riba e temanan aki y pa loke ta finansas, no tin duda cu nos, di Partido MEP, sigur lo percura pa haci un bon trabou di esaki, Parlamentario Wever-Croes a expresa.