Aeropuerto di Aruba ta celebra carnaval 71 cu un ceremonia oficial di premio pa e monarcanan y e finalistanan
Oranjestad, Aruba – Aruba Airport Authority N.V. (AAA) orguyosamente tabata anfitrion di un ceremonia oficial di premio pa honra e monarcanan y e finalistanan di carnaval 71 di Aruba. Como un sostenedor dedica na e herencia cultural di Aruba, AAA ta orguyoso di por partner cu SMAC y Stichting Musica pa organisa e eventonan importante aki como parti di e celebracion di carnaval y reconociendo e personanan talentoso cu ta trece e tradicion aki tan stima na bida.
“Carnaval ta un evento iconico cu ta resalta e cultura rico di Aruba, uniendo nos comunidad den un celebracion alegre”, asina Marylin Feliciana, Marketing & Communications Manager na AAA a expresa. Feliciana a continua bisando: “Carnaval ta mas cu djis un festividad—e ta un expresion di nos comunidad. E ta mustra nos musica diverso, talento y hospitalidad caluroso na mundo. Na AAA, nos ta orguyoso di ta parti di e celebracion cultura aki y di sostene su crecemento pa futuro generacionnan.”
Durante e ceremonia, Aeropuerto di Aruba a duna e monarcanan di carnaval y e finalistanan voucher di biahe, loke ta duna nan e oportunidad pa nan scoge un destinacion for di e variedad di e destinacionnan for di Aeropuerto Internacional Reina Beatrix.
Como e porta di entrada pa e isla pa esnan cu ta biaha, Aeropuerto di Aruba ta hunga un rol crucial den conecta cultura di Aruba cu mundo. Door di sostene e eventonan manera carnaval, AAA ta sigui destaca e herencia rico di Aruba, fortalece turismo y fomenta oportunidad pa e negoshinan local.
