Declaracion di DVG encuentro barco crucero MS Eurodam
ARUBA- 25.02.2025. Departamento di Salud Publico a tuma nota di un publicacion riba media social encuanto e barco crucero MS Eurodam, caminda ta insinua cu na Aruba ta permiti malesa drenta via barco crucero mientras cu otro isla si no ta permiti esaki.
Ta importante pa keda informa comunidad cu DVG ta encarga cu e monitoreo di malesanan infeccioso cu tin abordo di tur crucero cu drenta Aruba. Esaki ta sosode por medio di e asina yama “Maritime Declaration of Health (MDH)” cu tur barco crucero ta obliga di entrega na DVG prome cu drenta e puerto di Aruba. A base di analisis di e informacion ricibi pa medio di e MDH di 72 ora-48 ora-24 ora, diadomingo anochi (prome cu e barco a drenta Aruba dialuna mainta) un email a wordo manda pa e operador di e crucero y su persona na su turno a manda esaki pa e dokter responsabel riba e barco, bisando lo siguiente: “Aunque ta mira un disminucion den e casonan di gastroenteritis agudo (AGE), e limite permiti di 3% di AGE bou di pasajero a wordo surpasa, indicando un brote di AGE abordo. A pesar cu DVG ta informa cu e personanan afecta ta sigui den isolacion. Pa garantiza salud y seguridad di esnan abordo y pa nos isla, mester sigui estrictamente e siguiente medida nan sanitario”:
- E personanan malo mester keda riba e crucero y sigui e protocol nan di isolacion te ora e dokter dicidi otro.
- Aunque medidanan sanitario a wordo eleva, mester pone extra atencion y cumplimento estricto cu tur medida nan di higiena.
Tambe di e crucero mes nan a informa nos cu nan a subi nan medida nan di higiene di nivel 2 pa nivel 3.
DVG a duna conseho y recomendacionnan valido na e barco pa asina nan por contene e brote di Norovirus a bordo. Norovirus ta ocaciona diarea, sacamento y dolor di bariga cerca e persona afecta y ta un virus cu regularmente ta ser detecta of ta presente riba barconan crucero.
E sistema di vigilancia/ monitoreo cu DVG ta sigi ta forma parti di un programa regional Carribean Vessels Surveillance System di Caribbean Public Health Agency (CARPHA).
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw