Tsunami a “bari y mop” den premio: Soca King Freddy Rasta a gana “Roadjam 2025”

E cancion “1 for Unity” composita pa Jeon y Freddy Rasta y aregla pa Rygel Isabella pero canta pa Freddy Rasta, no solamente a gana e premio maximo den Soca Monarch pero awe tambe confirma cu pueblo a acept’e y a biba cu ne den e paradanan. Consecuentemente, e medionan di comunicacion a honr’e cu e reconocimento di “Roadjam 2025”. “1 for Unity” a gana e curason di comunidad di Aruba danki na e mensahe di union y positivismo.

E medionan cu a honra Freddy Rasta y e banda Tsunami cu e premio aki tabata Radio Top 95 FM, Canal 22, boletinextra.com, corant Solo di Pueblo, MAS FM, masnoticia.com, 24ora.com, corant TREMPAN, Enfoke, Telearuba, Ivo 4 Live, Zayon on the air, Chando Colina, Power FM, Galactica y “Coolest Carnival Track” na Cool FM. Nan tur, via nan mesun plataforma of a base di encuestanan interactivo a conclui cu e pueblo a sostene “1 for unity” como esun preferi pa e temporada aki.

Tocante “Roadjam”

Na 1987 Roberto Geerman hunto cu algun otro DJ mas di Canal 90 FM a crea e famoso nomber “Roadjam” di Carnaval. Por corda cu na 1987 tabata un aña hopi exitoso pa cu musica den carnaval. Un cancion cu a resalta ariba caya tabata “Theolinda” canta pa Mighty Rusty cu e banda “Boys Next Door”. Na final di e parada di Carnaval 33, na aña 1987, Roberto Geerman hunto cu e otro locutornan di Canal 90 FM den nan entusiasmo tabata anuncia “Roadjam, Roadjam” y a declara “Theolinda” como e Roadjam di Carnaval, un premio of nomber cu nunca tabata existi. Te cu awe ainda ta papia di “Roadjam”.

Tocante Freddy Rasta

Malaghy “Freddy” Richardson, miho conoci artisticamente como “Freddy Rasta” no ta un desconoci den e mundo farandulero. Desde aña 2012 e ta participando den e festival di caiso y soca, pero a dur’e 13 aña pa por a conkista e corona. Mester menciona si cu el a yega di sali na di tres luga na aña 2018. Den su di tres participacion cu e banda Tsunami, el a logra sobresali riba tur otro y asina a domina e temporada di carnaval.

Tocante Tsunami Aruba

A funda e banda dia 2 di januari di aña 2004. Tsunami ta un di e gruponan mas grandi y conoci na Aruba. E combinacion unico cu influencia latino, caribense y local combina cu e enfoke riba e instrumentonan en bibo a impulsa Tsunami na e nivelnan mas halto di exito. No ta un secreto cu e brassband popular D2U365 a duna luz na un banda hopi prometedor: Tsunami.

E concepto di Tsunami a tuma mas o menos dos aña pa cristalisa. Algun di e personanan clave den brassband tabata ansioso pa haci un cambio den e musica cu nan tabata haci caba. Nan a cuminsa busca diferente alternativa y influencia cu lo a mescla den un estilo unico cu nunca antes Aruba a mira ni tende. 

E meta principal tabata pa crea un banda cu lo a mira, zona y basicamente haci tur cos den un forma cu nunca antes a haci na Aruba. Tsunami ta un nomber cu ta representa puresa di awa y forsa y ademas e energia di ola. Tsunami su musica y actuacion ta puro mirando cu ta hacie for di curason, e forsa y energia cu nan ta pone den cada actuacion ta contagioso pues wak caya!