Bonaire ta Apela na CARICOM pa Sosten kontra Re-Kolonisashon
Bridgetown, Barbados – E delegashon di Bonaire a tene reuniónnan bilateral ku lidernan di CARICOM durante e 48 Reunión Regular di CARICOM di Hefenan di Estado na Barbados pa diskuti e kaso urgente i ku a empeora di Bonaire, unda e pueblo nativo ta siendo marginalisa riba su propio isla.
E delegashon ta ekstende su felisitashonan sinsero na e Honorable Prome Minister di Barbados, Mia Amor Mottley, pa su apuntashon komo Presidenta di e Komunidad Karibeña (CARICOM). Bonaire ta rekonosé su liderazgo firme den avansá integrashon regional i aborda desafionan kritiko ku ta enfrenta e region di Karibe.
E delegashon a hasi un apelashon direkto i urgente na lidernan di CARICOM pa para den solidaridat kontra e re-kolonisashon di Bonaire—un realidat alarmante den Karibe den Siglo 21.
Despues di disolushon di e Antia Hulandes na 2010, Bonaire a wordu ilegalmente integra den e konstitutshon Hulandes bao di kondishon desigual, sin konsentimentu di su pueblo. Desde e momento ey, e poblashon nativo a disminui drástikamente, di mas ku 80% prome ku 2010 te menos ku 32% awe. E bahada aki ta wordo impulsá prinsipalmenti pa politika di permití inmigrashon sin restrikshon di siudadanonan Hulandes Oropeo, ku ta haña derecho di vota den elekshonnan lokal i referenduman despues di 90 dia despues di nan yegada. Mas ahinda, Papiamento—idioma nativo di e isla— a wordo remplasá pa Hulandes komo e idioma prinsipal di instrukshon den skol, amenasando sobreviviensia di kultura, identidad i existensia di Bonerianonan.
Pa reakshona na e krisis aki, Bonaire ta hasi yamada na CARICOM pa tuma akshon kolektivo, similar ku e resolushon ku a wordo adoptá na e di 97 Seshon Ordinario di e Parlamento di MERCOSUR den December 2024, ku a deklara sosten pa re-list di Bonaire komo un Teritorio Sin Propio Gobernashon bao di skrutinashon di e Komité Espesial di Deskolonisashon, C24 di Nashonan Uni. MERCOSUR ta konsisti di e paisnan: Argentina, Brasil, Bolivia, Paraguay, Uruguay, Chile, Colombia, Ecuador, Guyana, Panama, Peru, i Surinam.
“Mientras CARICOM ta kontinuá adopta solidaridad regional, risibiendo Korsou komo miembro asosia den 2024 i ta konsiderando St. Maarten Hulandes pa e mesun status e anja aki, nos ta urgí CARICOM pa tuma un posishon pa Bonaire i sostene su luga hustu legitimo riba lista di Territorionan-Sin-Propio-Gobernashon” e delegashon di Bonaire a enfatisa.
Boneiru ta mirando ansiosomente direkshon di e liderazgo di honorabel Prome Minister Mia Mottley i CARICOM pa segura ku e pueblo di e isla resibi protekshon internashonal ku nan merese.
