AVP ta cuminsa cumpli prome cu asumi oficialmente mando

ORANJESTAD – Partido di Pueblo Arubano (AVP) kier enfatisa cu e compromiso pa aumenta pension di nos adultonan mayor no ta djis un promesa di campaña, pero un accion concreto cu ta cuminsa materialisa te hasta prome cu e huramentacion oficial di e gabinete nobo di gobierno.

Simultaneamente cu e negociacionnan pa e formacion di e gobierno nobo y e proceso dialogo cu e diferente sectornan di comunidad, e fraccion di AVP cu ya ta huramenta den Parlamento, a bin ta traha activamente riba stapnan urgente pa mehora e calidad di bida di e pensionadonan. Danki na e gestion aki, a propone un aumento di 250 florin riba e reparatie toeslag di pension cu ta bira vigente for di 1 di mei proximo.

E compromiso di AVP cu adulto mayor ta uno firme y hopi cla for di comienso: garantisa un pension digno y suficiente pa cubri e necesidadnan basico di tur esunnan cu pa añanan largo a contribui na e desaroyo di nos isla. E implementacion di e aumento aki, pa medio di un reparatietoeslag, ta representa apenas e prome stap den e direccion corecto, rondona pa un plan integral cu e obhetivo di fortalece e sistema di siguridad social na Aruba. Nos ta sigur cu pueblo lo sa di mira e realidad, esta cu esfuersonan real ta andando.

Lider di partido, mr. Mike Eman: “Nos kier enfatisa cu aumento di pension no ta un promesa bashi, ni un tactica politico; e ta un decision tuma cu responsabilidad y planificacion, cu a cuminsa concreta prome cu e huramentacion di nos ekipo di gobierno. Mi promesa ta ‘den 100 dia di e gobierno nobo’ y esey mi ta para su tras ainda. Pero nos no a keda man crusa, ya caba for di parlamento nos a cuminsa traha y mustra resultado.”

E cambio cu AVP a priminti no ta un ilusion ni un promesa bashi di eleccion. E cambio a cuminsa caba. Nos lo sigui cumpli cu echo, y no cu palabra pasobra nos mision ta pa construi un futuro prospera pa tur; un prosperidad comparti.