Desaroyo economico den e parti Caribense di Reino

Miho acceso na servicio bancario y financiamento pa empresarionan. Miho conexion entre enseñansa y mercado laboral. Digitalisacion di procesonan y disponibilidad di dato pa maneho y ehecucion. E condicionnan esencial aki pa desaroyo economico di e parti Caribense di Reino tin para den e vision cu secretario di estado Zsolt Szabo, (Digitalisacion y Relacion di Reino) a manda awe pa Tweede Kamer, na nomber tambe di minister Dirk Beljaarts (Asuntonan Economico).

Desaroyo economico y capacidad pa para riba propio pia

Gabinete kier traha hunto cu gobierno-, empresario- y partidonan di interes publico y priva riba e islanan, riba solucionnan concreto pa desaroya economia di e islanan. Pa tur e islanan ta conta cu nan mes ta responsabel pa esaki. Pa loke ta trata Boneiro, Sint Eustatius y Saba, Gobierno Central tambe tin un papel pa promove desaroyo economico y e capacidad pa para riba propio pia. A traves di e Paketenan di Pais, Hulanda ta sostene e paisnan autonomo.

Secretario di estado Szabo: “un vision di termino largo pa economia cu tin sosten amplio, suficiente inversion publico, un mercado di capital cu ta funciona bon y bon cooperacion regional, banda di bon gobernacion y un gobierno financieramente sano, ta importante pa desaroyo economico y e capacidad pa para riba propio pia. Esaki ta esencial pa mehoracion di e condicionnan di bida y pa ofrece oportunidad nobo pa habitante- y empresarionan di e parti Caribense di nos Reino.”

Minister Beljaarts: “Pa un economia fuerte y pa ta prepara pa futuro den e parti Caribense di nos Reino, un acercamento bon cla, dirigi riba inversion y bon cooperacion ta crucial. Dunando espacio na empresarionan y ofreciendo habitantenan perspectiva, nos ta fortifica resistencia economico di e region.”

Prioridadnan economico di Boneiro, Sint Eustatius y Saba

A pidi cada isla pa duna di conoce kico nan ta mira como e prioridadnan economico mas importante, riba tanto termino cortico como termino largo. Asina por ehempel Boneiro ta trahando riba turismo duradero y fortificacion di e infrastructura, Sint Eustatius ta concentrando riba mas desaroyo di patrimonio cultural-historiko y turismo y Saba ta enfocando riba fortificacion di ecoturismo y desaroyo di waf. Pa tur isla ta conta cu e Regio Dealnan otorga, lo contribui na realisacion di e plannan.

For di diferente rapport y combersacion cu empresarionan, e entidadnan publico y sociedad civil ta bin cinco tarea importante dilanti cu no ta nobo, pero cu si ta importante pa desaroyo economico. Asina por ehempel acceso na servicionan bancario y financiamento ta necesario pa promocion di clima di inversion. Otro condicionnan esencial ta conectividad y infrastructura, menos gasto di transporte y presion di regulacion, un mercado laboral cu ta funciona bon, digitalisacion y disponibilidad di dato.

Sosten dirigi riba desaroyo economico di paisnan autonomo

Maneho di desaroyo economico ta un asunto autonomo di Aruba, Corsou y Sint Maarten mes. For di Hulanda ta trahando cu e paisnan Caribense riba financiamento accesibel pa MKB cu Garantia pa creditonan di MKB. A base di palabracionnan cu a haci den e Paketenan di Pais, ta cooperando pa un miho conexion entre enseñansa y mercado laboral y digitalisacion.

Na Sint Maarten ta realisando inversionnan den infrastructura, a traves di e Fondo di Maneho pa Reconstruccion di Sint Maarten di Banco Mundial. Ademas, na Corsou ta colaborando pa desaroya un cadena di hidrogeno berde y Caribbean Regional Technical Assistance Centre (CARTAC) ta dunando sosten den tur e tres paisnan Caribense.

Menos dependencia di importacion di cuminda
Siguridad di alimento ta un tema importante riba tur e seis islanan. Pa gran parti nan ta depende di importacion di cuminda for di exterior, loke ta haci nan vulnerabel y ta conduci na prijs di cuminda halto. Pa atende cu e retonan aki, gabinete a asigna 24 miyon euro, pa aumenta siguridad di alimento y reduci dependencia di importacion riba termino. Secretario di estado Szabo a nombra un kwartiermaker cu ta bay investiga cua instrumento ta mas adecuado pa logra resultadonan duradero y innovativo. Meta ta pa cuminsa cu ehecucion di e plan aki despues di zomer.

Riba 16 di april comision di Relacion di Reino lo debati cu Secretario di estado Szabo y Minister Beljaarts tocante desaroyo economico y capacidad pa para riba propio pia di e partinan Caribense di Reino.