Strategia uza den e lucha pa nos Status Aparte

Henny Eman sr y su yiu Shon A Eman tabata conciente cu pa Aruba logra su meta, su Status Aparte, Aruba mester a haya cooperacion tambe di miembronan di Staten di e otro islanan, en especial e miembronan di Corsou. Pa logra e cooperacion aki durante e di dos Guera Mundial. Henny a cera un aliansa strategico cu un otro gran lider di e tempo ey, mr. dr. (doctoor) Moises Da Costa Gomez. Doctoor Da Costa Gomez tabata un experto riba tereno di infrastructura estatal y tabata e persona cu a lidera e lucha di Antiyas pa autonomia. 

E entendimento (den cuadro di e asina yama ‘pacificatie’) entre Henny Eman sr y Doctoor tabata cu Henny lo duna sosten na e lucha di Doctoor pa autonomia y Doctoor lo duna sosten na e lucha di Henny pa Status Aparte. Tur dos tabata conciente cu nan tabatin mester di otro pa nan por logra nan meta. Meta cu na primera bista tabata parce contradictorio, pero cu nan a logra combina cu otro na beneficio di tur dos. E vision y strategia di Henny y Doctoor a funciona. 

E aliansa strategico aki cu a dura te na comienso di añanan 50 a resulta tambe den lasonan di amistad personal, sin duda tabata crucial; tanto pa realisacion di autonomia di Antiya como realisacion di nos Status Aparte. Hopi hende no sa, pero e mocion acepta den conferencia di Mesa Rondo tabatin sosten tambe di Doctoor Da Costa Gomez. Sin su sosten e mocion lo no a wordo acepta. 

Un otro parti di e strategia di Henny Eman sr y Shon A Eman tabata pa uni pueblo tras di nan meta. Como bon politico nan tabata sa cu nan tabatin mester di e pueblo. Pa demostra esaki mester mobilisa e pueblo pa pone presion politico. Ambos tabata sa hopi bon con tene manifestacionnan grandi. 

Den un accion nunca bisto di september 1947 pa januari 1948, den algo mas cu shen dia, Henny Shon A y otro lidernan di AVP a organisa 42 reunion den tur bario di Aruba pa recauda firma pa sostene e peticion na La Reina pa Aruba haya su Status Aparte den e constelacion nobo di Reino Hulandes. A recoge 2147 firma di hende homber di riba 21 aña di edad. Hende muhe e tempo ey no tabatin derecho di voto ainda. E peticion di pueblo di Aruba no solamente a wordo entrega na La Reina dor di Shon A Eman, e peticion tambe a forma e base pa e mocion cu Shon A como

‘Vertegenwoordiger van de Arubaanse bevolking”a entrega na e Conferencia di Mesa Rondo y cu a keda acepta dor di e partnernan den Reino: Hulanda, Surnam, y Antiya riba 18 di maart 1948. 

Hopi aña despues na 1976, e fecha aki a keda inmortalisa pa e lider di MEP Betico Croes, como nos Dia di nos Himno y Bandera, nos Dia Nacional