Prome Minister Eman ta wanta asfaltamento di caminda pa Secrets HotelDecision a base di carta di Carmabi

Den su calidad di minister pa naturalesa tambe, prome minister mr. Mike Eman a informa DOW cu e caminda cu nan lo a cuminsa asfalta dialuna 31 di maart pa yega na Hotel Secrets lo no por sigui prome cu algun condicion importante pa proteccion di naturalesa wordo stipula.

Den prome dia di trabao den fin di siman prome minister Mike Eman a wordo acerca cu un reto pa cu e planning cu DOW lo a inicia e trabaonan pa traha un caminda di asfalt pa acceso pa Hotel Secrets dialuna 31 di maart.

Sinembargo Eman a haya un conseho, fecha 27 di maart, di e organo Fundacion Carmabi cu ta bisa cu e “ontheffing” pa kita e matanan protehi no por wordo duna pa motibo di aspectonan di legislacion riba cual mester basa e “ontheffing” aki.

Prome Minister como Minister di Naturalesa a informa DOW pa wanta cu e caminda. Eman ta mustra con na momento di traha e brug pa Green Corridor a stipula e condicionnan pa replanta e matanan protehi manera e mangelnan na e mesun cantidad of mas den e mesun bisindario.

Eman ta bisa cu “nos mester bira hopi mas estricto cu proteccion di nos naturalesa”. Si circumstancia no por evita cu mester construi un infrastructura, e ora mester replanta un cantidad of mas di e matanan. “Proteccion di nos flora y fauna ta hopi importante y e propio economia ta depende tambe di e bunitesa di nos isla”, Prome Minister Eman ta enfatisa. Minister mr. Arthur Dowers lo ta encarga cu DOW y Prome Minister Eman cu Naturalesa y entre nan lo mester sali for di e dilema aki.