Partido MEP: TRASPASO MAS ORDENA DEN HISTORIA DI PAIS ARUBA
Evelyn Wever-Croes ta drenta historia como e prome lider femenino di nos pais, cu logronan grandi
ORANJESTAD – Diabierna ultimo, a tuma luga e traspaso di gobernacion di Gabinete Wever-Croes 2 pa e gobierno nobo. Un traspaso ordena y debido, un ehempel pa henter comunidad.
Rivalidad politico mester tuma luga den debatenan politico, pero traspaso di un gobierno pa otro, no mester ta den e arena ey, y esey ex Minister President Evelyn Wever-Croes a sa di demostra na varios ocasion. Ultimo tabata na entiero di señor Henny Eman qepd, caminda cu apesar cu e mes tabata den exterior pa motibo di salud, a haci tur esfuerso humanamente posibel pa señor Henny Eman a haya un entiero di estado y digno pa un ex prome minister.
E traspaso diabierna ultimo, y e forma con ambos lider politico a expresa di e traspaso, a duna henter comunidad un sentimento di orguyo y di trankilidad cu e gobierno nobo por drenta y sigui traha sin problema. E traspaso a wordo sigui na nos islanan ruman tambe, caminda cu tabata tin varios comentario positivo.
Den pasado tabata tin traspasonan pero nunca asina documenta y ordena manera esaki. “Mare nos tabata tin mas tempo pa papia, pasobra ta hopi cos mas mi lo kier a comparti cu sr. Eman. Sinembargo e mester a bai huramenta y nos no kier strob’e di esey. Mi a bis’e si cu dia nos drenta bek den gobierno, nos kier un traspaso debido tambe.
Mi ta gradici sr. Eman y su coleganan minister pa a acepta nos invitacion pa un traspaso debido y ordena, y mi ta desea nan cada un hopi exito y hopi sabiduria”, tabata palabranan di sra. Evelyn Wever-Croes, ex prome minister di pais Aruba, cu pa e acto aki tambe, ta drenta historia no solamente como e prome lider femenino di nos pais, sino tambe un lider hopi respeta na Aruba, den Reino y internacionalmente, pa su forma di a goberna.
