Fraccion di AVP: Mester duna Gobierno nobo espacio pa tuma su mesun decisionnan

Recientemente durante tratamento di presupuesto 2025 a bin dilanti diferente mocion y amienda specialmente di banda di oposicion. Gobierno nobo di AVP-Futuro no tabatin ni 10 ora cu a instala y ya oposicion ta exihi cu nan kier sigui determina e pasonan cu kier tuma, ki suma mester aloca, unda y den ki termino di tempo.

Tur e mocionnan y amienda presenta ta mustra cu ta sali di e punto di bista cu ta hopi sector mester atencion pareu y urgente. Ta mustra cu e realidad di Aruba ta cu nos pais ta den un deterioro grandi, topiconan manera entre otro enseñansa, sector social, salubridad, fintech, vivienda, siguridad, cuerpo policial falta apoyo financiero y di profesional, un KIA cu pa hopi aña ta wardando un solucion pa cu su estado critico, awor despues di casi 8 aña ta tende e gritonan di cambio awor!

Tur e puntonan cu a ser treci dilanti ta den e plan di gobernacion di AVP-Futuro y e gobierno nobo tambe tin su planan pa cu e topiconan aki. E presupuesto 2025 no tabatin hopi maneho den dje netamente pa crea espacio pa e gobierno nobo bin cu cambio desea y awor ta sapatia pa motibo cu no ta acepta oposicion su terminonan. Oposicion ta den e bankinan di oposicion pa un motibo, pueblo a duna un mandato nobo na AVP- Futuro pa goberna!