Partido MEP: E DECISION DI E GABINETE ACTUAL AVP- FUTURO PA ELIMINA E FIANSA NA FCCA DI E PRESUPUESTO TA UNO HOPI NEGATIVO PA ESNAN WARDANDO RIBA UN VIVIENDA SOCIAL

ORANJESTAD – Diabierna ultimo, Parlamento a trata presupuesto 2025. Despues cu e Gobierno nobo a huramenta a sigui di biaha pa tratamento di e presupuesto na unda cu por a nota cu e Gobierno nobo a propone algun cambio.

Parlamentario pa fraccion di MEP Evelyn Wever-Croes a indica cu e presupuesto aki a wordo crea pa Gabinete Wever-Croes II, na unda a inclui un fiansa pa FCCA di 17 miyon florin pa asina riba termino corto FCCA por traha entre 150 pa 200 cas social. Lamentablemente e Gobierno di AVP-FUTURO a elimina e fiansa aki pa asina pon’e den un fondo di inversion cu no ta defini ni tin un plan ainda di ki tipo di inversion esaki lo ta.

Parlamentario Wever-Croes ta lamenta e decision di e Gabinete nobo mirando cu no por warda mas pa bin cu solucion pa cu e tema di vivienda social. Tin un total di mas di 3000 hende wardando riba un cas social, y e 150 pa 200 casnan aki sigur lo a cuminsa na trece un poco alivio pa esnan wardando. Gabinete Wever-Croes a purba na soluciona e problema aki pa hopi tempo, y dunando FCCA e fiansa aki tabata e unico solucion riba termino corto.

E Gobierno di AVP-FUTURO a indica cu nan lo kier bay studia e materia, pero e estudionan pa cu esaki tur ta haci caba. Fraccion di MEP den Parlamento lo percura pa e Gobierno aki trata e tema aki pronto y bin cu un plan alternativa pa brinda alivio pa loke ta vivienda social na Aruba. “Nos a bin cu un solucion despues di hopi estudio, y mi ta lamenta cu e gobierno nobo ta kibra e proyecto aki, cu ta un proyecto importante pa famianan di menos recurso. Ami lo hasi tur di mi parti pa e proyecto aki sigui, pasobra cada famia merece di tin un cas pa biba aden”Evelyn Wever-Croes.