Miguel Mansur na Evelyn Wever-Croes: STOP DI GAÑA!

Un rato pasa mi a tuma nota di un comunicado di prensa di Prome Minister Evelyn Wever-Croes ta declara cu ta Griffier di Staten a pidi pa e suspende sra. Arminda “Liesje” Khemlani-Flanegin. E declaracion aki ta un otro ehempel di Sra. Wever-Croes ta expresa un mentira sin misericordia. Sra. Wever-Croes cu no ta forma parti di Commissie Huishoudelijke Aangelegenheden (CHA) ta purba tapa loke ta bisto na tur hende di ta persecucion politico. Diahuebs ultimo tur hende na Staten a keda sorprendi cu e prohibicion di acceso na edificio di Parlamento emiti na Sra. Khemlani-Flanegin, firma pa Prome Minister.

E mesun dia Gabinete Wever-Croes a publica e acusacion contra Sra. Khemlani-Flanegin sin cu CHA mes a wordo informa cu 1) tabata tin un keho entrega y 2) cu un carta di prohibicion di entrada a wordo emiti. Ban pone un banda e supuesto acusacion di a haci trabaonan politico cu ta un ehempel di hipocresia sin precedente. Ban pone DRH su credibilidad un banda apesar di un sin fin di caso di persecucion politico cu nan ta complice aden.

Despues di supuestamente a ricibi un keho, DRH lo a cuminsa un investigacion. Na momento cu e keho a wordo entrega e lo mester a keda trata den CHA pero esey no a sosode. E mesun dia cu a firma e carta di prohibicion di entrada, Gabinete Wever-Croes ta publica e acusacion sin cu CHA mes a wordo informa y alabes nan kier hunga rol di judge, jury y executioner. Despues Voorzitter di Staten ta duna un entrevista indicando cu ta toca Sra. Wever-Croes firma e carta paso Parlamento no ta independisa, otro mentira flagrante. Den e mesun rosea e kier menciona e palabra integridad mientras ni su persona ni Prome Minister ta gosa di un gota di integridad.

Manera mi a declara previamente, falsedad ta parce di ta contagioso. Cu su cualificacion huridico tur desacredita cu por tin pa Raad van Advies, awor Voorzitter di Staten kier bay defende e susedidonan a base di mas mentira. Hopi di nos den Parlamento ta sospecha su persona di ta tras di e persecucion di Liesje. Pa bo ta integro bo mester ta honesto, e realidad cu ta keda comproba repetidamente ta cu ni sr. Vrolijk y tampoco sra. Wever-Croes ta papia berdad. Mi a yega di vocifera den Parlamento cu Minister President tin un relacion turbolento cu honestidad, nan ta gusta bandona otro y esey a bolbe keda proba cu su ultimo relato.

Cada biaha mi pensa cu sra. Wever-Croes a toca fondo cu su falsedad y gañamento e ta sigui coba un buraco mas hundo. Tarde o temprano e berdad semper ta sali. Sigur cu ta un lastima cu un empleado fiel di Parlamento pa mas cu 30 aña ta wordo perhudica paso kisas ya e no ta sostene e gobierno na mando. Cu awor Prome Minister ta purba involucra Griffier di Staten den su mentiranan sigur ta lamentabel. Cu e bendicion di su marionetanan nan ta categoricamente purba desmantela nos sistema constitucional di checks and balances a base di manipulacion y mentira.

Mientras Gabinete Wever-Croes su desesperacion ta sigui crece pa escasez di fondo, escasez di capacidad y escasez di un minimo plan pa rescata nos pais, nos lo por spera mas actonan di cobardia. Accion21 sigur lo sigui pendiente pa lucha contra e abuso di poder, corupcion y nepotismo cu ta defini e gobierno actual.