PAKICO TA TRATA NA CRUCIFICA LIESJE KHEMLANI?

Como un persona cu un trayectoria largo den politica, mi a bin realisa cu mester ta sumamente cuidadoso pa kere sin mas den palabra di e gobernantenan actual y simpelmente confia bo “gut feeling”. “Gut feeling” ta un instincto necesario pa por sobrevivi den politica. Experencia ta mustra cu mester tene cuenta cu “gato escondido” principalmente di bo supuesto “amigonan”. P’esey e pregunta ta: kico por ta e “gato escondido” den e caso di Liesje Khemlani?

Pakico mester a sacrifica sra. Khemlani? E ta un persona asina maligno cu tin intencion pa boycotea e funcionamento di Parlamento door di keda sin cumpli cu su funccion den parlamento debidamente? Mi no ta kere cu lo por tin un Parlamentario den pasado y awor cu no a haya e apoyo necesario for di Liesje ora cu a acerca su persona pa ayudo. Pues dicon diripente e accion draconico cu Prome-Minister a tuma contra di Liesje??

E contesta nos ta haya ora repasa historia politico di e ultimo aña na Aruba. Na comienso di 2020 Hulanda tabata cla pa duna Aruba un “aanwijzing”! Premier a core bay Hulanda pa pidi pordon pa incumplimento cu palabracionnan cu e mes a haci, pero loke a salba su berguensa ta cu e pandemia a presenta su mes y gobierno por a haya otro rosea. Diripente tur atencion tabata riba e pandemia y e djodjomento cu placa publico por a sigui manera a sosode e.o.na Serlimar. E integrantenan di MEP a prefera di sacrifica un di nan propio parlamentarionan pa faborese un minister corupto te den su higra. Mas pio ainda apoya y respalda pa henter e gobierno POREDmep, particularmente dor di e Prome Minister.
E mesun modus operandi a sosode ora kier a deshasi di un Minister di e gabinete Wever-Croes 1. Enbes di atende cu e actonan di corupcion cu tabata wordo presenta pa e Minister en cuestion, a prefera di sacrifica e Minister aki. A bay asina leu cu hasta e Presidente di Parlamento a presta su mes pa comete actonan ilegal y penal, cu no por a wak luz di dia sin cu esaki tabata tin consecuencia.

Pues e contesta pakico mester sacrifica Liesje ta simpel y hopi obvio. * E relacion cu Hulanda atrobe no ta mucho cos di gaba. * E relatonan di CAft ta menos positivo. * Gobierno atrobe manera ta e caso desde 2014 ora no a cumpli cu palabracionnan haci.
Pa desvia atencion ta trata na crea e impresion di ta “the good guy”, cu ta yen di manipulacion.
Ta core organisa un jump up pa ciere di carnaval y aki aya ta duna un sosten financiero chikito na amigonan di partido.
Pero “watch out” si bo mester hinca den bo cabes pa cuestiona e maneho. Bo lo wordo persigui di mala forma ora cu un empleado publico ta mustra cu gobierno ta fout. Aki gobierno ta tapa su eror dor di crea storianan pa bin insinua cu ta e ambtenaar ta esun cu no ta cumpli!
Esaki ta exactamente loke a pasa cu sra. Kathy Paskel di Dimas. Sra.Kathy Paskel mester a wordo sacrifica y consecuentemente a hinca miedo den otronan, pa di e manera ey Glenbert Croes por fix y engrandece e corupcion cu a mira luz di dia desde fin di 2009. Pa colmo tur esaki cu consentimento y sosten absoluto di e gobierno MEP/RAIZ!
No ta esaki ta loke ta sosode den regimennan totalitario na unda ta hinca miedo di esnan cu ta tribi di denuncia maldadnan di e gobierno?

Den caso di Liesje e motibo ta un poco diferente! Nos tur sa cu pronto e pueblo lo wordo hiba na e altar di sacrificio pa un biaha paga pa e corupcion, abuso di poder y mal gobernacion di nos gobierno! Pa motibo cu no tin e curashi pa frenta e pueblo, mester hinca MIEDO den e pueblo.
E pandemia ya no por ser usa pa desvia atencion ora cu yega e momento cu mester bai tuma e medidanan cruel cu lo bai masacra nos pueblo.

Pues mi “gut feeling” ta indicami cu aki atrobe e gobierno actual y principalemente e premier “gaat over lijken” djis pa keda na poder. Pues mester inventa un plan diabolico. E persecusion politico di Liesje ta parti di e plan diabolico aki, procedente di e mente diabolico y maligno di e Minister Presidente y su gang di Alibaba.
Y obviously pa stroba oposicion por hasi su trabow manera mester ta pasó nan no por haya e documentonan necesario pa hasi nan trabow. Ta pesey mester crea algo, un desvio di atencion, pa algo cu ta bay sosode.

Pues cu e abusonan di poder aki mester fungi como un advertencia cu un atraco formal lo ta na caminda riba cartera di nos pueblo. Nos NO por acepta cu sin mas ta kere di por atacha integridad di hendenan drechi cu e unico proposito pa tapa e berdad y hinca miedo den nos pueblo pa por pasa e pueblo e “cleste” djis pa tapa e berdad di e gobierno mas malo y abusador cu a existi na Aruba.
E plan diabolico aki mester wordo para y ta di spera cu Parlamento, maske ta pa e biaha aki, lanta para y bisa te aki e abuso di poder aki a yega.
Si esaki no sosode e Minister Presidente lo sigui cu e ehecucion di plannan diabolico y Machiavelico.
Poco poco nos democracia cu tabata conoce algun “kraak”, lo bai “SCHEUR” completo y derumba!
Manera mi a bisa caba cu tur poder a wordo concentra den un solo persona y mi a yama e pakete di RAIZ un “REST-PAKKET”, cu lo no dura mucho cu nos democracia lo bira un “AUTOCRACIA”!
ARUBA, UNDA BO KIER BAI??