Parlamentario Evelyn Wever-Croes : FRACCION DI MEP A REUNI CU FAMIA PLANIA

ORANESTAD – Diaranson ultimo Parlamentario Evelyn Wever-Croes conhuntamente cu miembronan di fraccion di MEP a reuni cu fundacion Famia Plania. E fundacion aki ta traha riba conscientisacion di diferente areanan pa loke ta sexualidad den nos muchanan, hobennan, pero tambe adultonan. E servicio cu nan ta brinda ta di suma importancia pa asina tur hende tin un bida sexual saludabel desde chikito te na grandi. 

Parlamentario Wever-Croes a indica cu e lamentablemente e fundacion aki tambe mester di mas fondo pa por opera di un manera mas eficiente. Mirando e trabou grandi cu nan ta haci y pa sigura cu nan ta continua cu nan trabounan, a purba di aloca mas fondo pa nan durante tratamento di presupuesto ya cu awor tin mas placa. 

Durante e reunion, fundacion Famia Plania a duna miembronan di fraccion di MEP un presentacion di e planesnan cu tin pa futuro. Parlamentario Wever-Croes a expresa cu despues di mira e presentacion, ta sinti aun mas e necesidad di mas fondo pa e fundacion, y hunto cu fraccion di MEP lo sigui haci tur lo posibel pa nan haya e fondonan rekeri pa asina por sigui duna e servicio na comunidad. 

“E ta importante pa nos muchanan sinti nan mes comfortabel cu nan mes, pa asina nan tin un bida mas saludabel den cual nan ta confía y stima nan mes mas. Pa e motibo aki ta importante pa fundacion Famia Plania por haya e fondonan necesario pa por sigui cu e bon trabou cu nan a bin ta eherciendo” Parlamentario Wever-Croes a expresa.