DEN CONEXION CU LUNA CONTRA ABUSO DI MUCHA FRACCION DI MEP A BISHITA BUREAU SOSTENEMI

ORANJESTAD – Den cuadro di luna contra abuso di mucha, Parlametario Evelyn Wever-Croes hunto cu Parlamentarionan Shailiny Tromp-Lee y Endy Croes a bishita Bureau Sostenemi. Abuso di mucha por ta de diferente forma manera abuso verbal, físico, sexual pero tambe negligencia cu ta algo cu ta pasa hopi na Aruba. 

Parlamentario Wever-Croes a splica cu na Bureau Sostenemi ta unda e yamadanan ta drenta pa cu abuso di mucha, y manera e yamada drenta ta cuminsa cu un investigacion pa wak ki paso mester wordo tuma. Bureau Sostenemi ta un departamento di gobierno, cu pa tur e yamadanan cu ta drenta, no tin suficiente personal.

Durante e reunion nan a trece dilanti nan precupacionnan y specialmente nan retonan, di cual fraccion di MEP ta compromete pa yudanan desde Parlamanto. Parlamentario Wever-Croes a expresa cu pa su persona e tabata hopi bunita pa scucha di nan, con durante e social crisis plan nan a sinti cu nan a haya e sosten real di gobierno, mirando cu nan a haya mas trahadonan social e tempo ey. Nan deseo ta pa tin e sosten di mas trahadonan social awor.  

Mirando cu Gabinete Wever-Croes a traha espacio financiero, lo ta bon pa enfoca pa duna un instituto manera Bureau Sostenemi e fondo necesario pa asina por haya e personal cu nan mester. Abuso di mucha ta un tema cu nos tur como ciudadano mester percura pa limita y elimina paso nos muchanan ta wak nos como esunnan cu mester protehenan y duna nan e cariño y amor cu nan merece. 

Parlamentario Wever-Croes a indica cu e reunion tabata uno hopi informativo cu desde di Parlamento den e comicion di asuntonan social lo sigui traha pa asina institutonan manera Bureau Sostenemi wordo fortifica y pa nan tin mas fondo pa asina nan por haci nan trabou di un miho manera y yuda nos pa limita y preveni abuso di mucha.