Prome Minister mr. Mike Eman hunto cu vice-premier mr. Gerlien Croes a haci apertura di exposicion “E liña fini di e horizonte”

Gabinete AVP-Futuro lo eleva nos cultura.

Diabierna 11 di april, na Biblioteca Nacional Aruba (BNA) minister-president mr. Mike Eman encarga cu e Ministerio di Cultura, hunto cu vice-premier mr. Gerlien Croes a haci apertura di e expo “E liña fini di e horizonte” un exposicion di pintura bou guia di Elvis Lopez.

“Ora nos sinta pensa, contempla y analisa e artenan; e ta provoca nos pa forma un maneho nobo pa eleva nos arte y cultura. Cada dibuho, cada arte ta provoca un reflexion riba nos relacion cu tera y fauna. E no ta bay pa bunitesa superficial e ta bay p’e preguntanan cu arte ta provoca den nos curason.” e mandatario a remarca durante e atardi cu tabatin hopi siguido di arte presente den sala. Prome Minister mr. Mike Eman a comparti tambe cu ya caba for di siman pasa diasabra a inicia algun sesion pa “brainstorm” rib’e vision y maneho di nos cultura.

Pa Elvis Lopez e obranan ta reafirma e esfuersonan di Atelier’89 pa promove arte den nos comunidad. Un exposicion unico y diferente cu a conta cu participacion di varios artista. Prome Minister Eman a gradici Atelier’89 pa nan persistencia den sigui eleva arte riba nos isla. Durante e anochi di apertura e ministernan di Gabinete AVP-Futuro a ricibi un recorido di e exposicion guia pa Nuris Lampe cu ta un di e dies artistanan cu a participa na e tayer. E atardi tabata acompaña pa musica di Vivian Lampe riba piano. Artista Kien Sang Lie Kwie a obsekia un pintura unda ta resalta e nummerplaat A-1961, aña natal di premier Eman y tambe di e artista. E exposicion ta habri pa publico pasa bishita na Biblioteca Nacional Aruba na Oranjestad y ta completamente gratis.