Nos a celebra Dia Internacional di Poesia cu un anochi multi-disciplinario cu poesia, arte, baile, canto y declamacion
Parlamentario Shailiny Tromp-Lee:
Diaranson ultimo dia 23 di maart 2022, hunto cu mi colega Marco Berlis, mi a asisti na un anochi masha special dedica na Dia Internacional di Poesia. E anochi tabata uno multi-disciplinario cu poesia, arte, baile, canto, documentario y declamacion.
Dia Internacional di Poesia ta un dia proclama pa Unesco y despues di 2 aña, manera di custumber, Biblioteca Nacional conhuntamente cu Departamento di Cultura a organisa un evento pa celebra e dia aki. Biblioteca Nacional tabata yen yen y tur presente a keda encanta pa tur creatividad cu a keda presenta e anochi aki. E anochi a habri cu nos Himno Aruba Dushi Tera y despues a sigui palabranan di Minister President caminda e la enfatisa cu creatividad no ta un opcion, pero cu e ta hopi esencial. Tambe nos por a scucha nos Minister di Cultura y Financien declama un poema propio titula ‘Mi ta namora di mi Pais’.
Durante e anochi aki, parti di dos documentario a keda presenta uno di sr. Rufo Wever dfm dirigi pa sr. Norman Thijsen den colaboracion cu subrina di Rufo Wever sra. Vivian Wever y aporte di diferente otro personanan. Un documentario cu a keda traha pa siña nos conoce un tiki mas di sr. Rufo Wever. Un persona cu a laga asina un legado importante pa nos pais. Ya caba nan a cuminsa traha riba e di dos parti di e documentario aki.
Otro grabacion cu nos por a mira tabata con sra. Olivia Benschop-Erasmus ta conta dicon y con el a traha su obra di man, ‘Biyetenan di Aruba’ cu a keda presenta riba e anochi aki. Obranan cu a tuma hopi tempo y cu el a traha durante di e pandemia. Cada un di nos biyete di florin a keda traha riba tela caminda solamente e la haci uzo di su mannan y creatidad. No a uza ningun instrument pa pinta liña of ronchi. E obranan bunita a keda desvela pa yiu y nietonan di sra. Benschop.
En conexion cu Dia Internacional di Poesia un total di 6 cuidadano a ricibi un homenage pa nan esfuersonan riba tereno di enseñansa, cultura y arte. Personanan cu di un manera of otro a aporte grandemente na e terenonan menciona. Un pabien na cada un di nan.
Sigur e anochi no por a bay sin e declamacion di poesia. Diferente participante di Poeta di Patria a declama durante e anochi aki y tambe nos Poeta di Patria Marilis Becker. Alabes sra. Leticia Wever a declama dos poesia cu ta forma parti di su publicacion cu dentro di poco lo ta riba mercado.
Durante e anochi tabatin presentacion tambe di Jack Tromp cu a deleita tur presente cu diferente cancion y un presentacion di baile. Un anochi caminda mi a topa cu amantenan di nos arte y cultura cu semper ta asisti na e actividadnan aki pero tambe personanan cu pa prome biaha a asisti y cu a keda encanta. Sigur a keda enfatisa e necesidad di e anochinan cultural aki pa asina por gradici y mas cu tur cos brinda plataforma pa nos artistanan por presenta nan talentonan. Un danki y pabien di curason na tur cu a haci e anochi aki posibel.
