Fraccion di AVP solidario cu comunidad Dominicano
Presente na vigilia pa victimanan di tragedia
ORANJESTAD (14 di april 2025) – Miembronan di fraccion di Partido di Pueblo Arubano (AVP) den Parlamento di Aruba a tuma parti den e ceremonia solemne cu Consulado di Republica Dominicana na Aruba a organisa diabierna ultimo na Plaza Juan Pablo Duarte na Playa.
Tabata trata di un vigilia pa recorda y resa pa tur e victimanan di e colapso tragico di dak di e nightclub Jet Set na Republica Dominicana siman pasa caminda 221 persona a perde nan bida repentinamente.
“Nos presencia tabata un gesto di solidaridad cu e comunidad Dominicano residente na Aruba, pa comparti nan dolor, uni den oracion pa e victimanan y nan famia y pa expresa nos sentido pesame,” asina lider di fraccion, Jennifer Arends-Reyes a indica.
E delegacion di partido AVP a inclui Presidente di Parlamento, Sr. Marlon Sneek, mientras cu Parlamentario Heyliger a hasi un oracion pa tur presente. Consul a reconoce y gradici e presencia di cada miembro.
Den momento di tragedia ta importante pa resalta loke ta uni nos manera ser humano: empatia, compasion y sosten mutuo. Aruba y e comunidad Dominicano tin un historia di convivencia y hermandad, y den momento di luto, nos ta re afirma nos compromiso cu esey.
Fraccion di AVP un biaha mas ta comparti su palabra di condolenccia y sosten incondicional na tur esunnan afecta pa e tragedia aki, sperando cu nan por haya forsa den e solidaridad di tur cu ta rondona nan y di e pueblo Arubiano den su totalidad.
