Ryçond do Nascimento: Partido Futuro ta mas cangreu cu un cambio

Un mentalidad di bandido a podera di nos gobierno. E constelacion nobo cu ta na poder ta kere cu ley ta existi pa yuda e poderoso, mientras cu e proposito di ley ta pa crea husticia y igualdad entre e podernan y e ciudadano. P’esey nos tin e dicho: ley pa un, ley pa tur.

Laga mi splica mi mes. Gerlien Croes, cu ayudo di e orbita di Alice van Romondt y Patrick Paskel, a lansa su mes como simbolo di renovacion, bos di pueblo cla pa cambio, hende cu a sali for di AVP pa motibo di principio y e alternativa pa un sistema corupto. Durante campaña 2024 el a vocifera critica duro contra corupcion, clientelismo y e falta di moral di AVP cu segun Gerlien a faya pueblo. El a insinua cu ta pa motibo di e corupcion di Mike de Meza el a bandona AVP. P’esey el a yama su partido Futuro, cu ta expresa speransa y direccion nobo.

Y awo?

Awo Gerlien Croes a core negocia cu Mike Eman pa e bira e vice-ministro mas poderoso den historia di Aruba: el a exigi relacionnan den Reino, pa e por profila como e lider den e relacion cu Hulanda y nos hermana islanan. El e exigi economia y finanansas, poniendo Aruba y e gabinete bao di su poder. Ta comosifuera cu e tin Mike Eman bao curatela. E no tabata kier Desiree Croes como minister plenipotenciario y e unico cos cu Mike a medio par’e ta riba e nomber di e gabinete. Sino awe nos tabatin Gabinete Eman-Croes. Toch Gerlien a haya su gana, pasobra awo e gabinete ta yama AVP-Futuro. Nan por a yam’e Gabinete berde light di biaha.

Pero, despues di a insinua cu AVP y especialmente Mike de Meza ta corupto y despues di a demostra di por haya tur loke e kier, Gerlien a duna Mike Eman luz berde pa apunta Mike De Meza como candidato pa bira minister. Ora bo brasa Mike Eman y Mike de Meza, ta kico bo ta spera? Mike ta plama un mentalidad di bandido atacando tur instancia cu mester enforsa ley (handhaving), ora cu e ley no ta cumbini AVP. Nos a wak esaki den caso di Paul Croes, nos a wak e den caso di Benny y e dianan aki nos a mira exactmente e mesun cos rond di e caso di screening di Mike de Meza. Naturalmente mi amigonan di 24ora mester a hunga un papel central den e atake aki, dunando e mensahe publico na Gobernador cu e debe un fabor politico na De Meza, demostrando un biaha mas e mentalidad di bandido di henter e orbita di AVP.

Analisa e situacion bon: ningun partido a haya un mayoria absoluto, cu otro palabra: ningun partido a haya mandato. Toch ta net cu AVP Gerlien kier traha. E AVP cu Gerlien mes a tilda di no ta transparente, responsabel y hasta cruel. Esaki no ta un compromiso estrategico. Esaki ta un traicion politico. Awe Gerlien ta proteha e sistema corupto cu e mes a priminti di cambia. Unda e palabranan “nos no por keda den e mesun rutina” a bay? Con por bo papia di cambio real ora e prome zet politico cu bo ta haci ta pa pone AVP bek na poder? E realidad ta cla pa tur hende por mira: esaki no ta renovacion. Esaki ta acomodacion di e politica di old boys. Un deseo pa sinta na e mesa den conseho di minister, un deseo pa poder, pa keda den e wega.

Pa tur cu ta compronde e politica di Mike, su uzo di pobresa combina cu sentimentalismo, ta compronde e manera con nan ta laba bo celebro cu e imagen di un dama sexy, mama hoben cu ta papia cu pasion di su sacrificio personal, cu a sufri den man di AVP pa para pa lo corecto. Pero e echonan no ta gaña. Mira ken ta e aliado y partner di coalicion di hendenan cu Gerlien mes a condena. Y si pueblo ta sinti su mes comodo cu e tipo di boltiamentonan aki, ta pueblo mes ta co-responsabel pa promove un mentalidad di bandido. Si nos kier prosperidad pa nos yiunan y nos nietonan e tempo pa nos habri nos wowo ta awo.